Como se anunciou no momento de lanzamento de cada unha das camisetas desta temporada, Galicia Azul, Galicia Atlántica e Galicia Verde, as camisetas do Dépor 2022-2023 servirán para pór a disposición da sociedade o potente altofalante social do Club e organizar ou colaborar na difusión de campañas de concienciación de coidado e limpeza dos mares, costas e bosques, proxectos cos que colaboramos a través da nosa Fundación para contribuír aos Obxectivos de Desenvolvemento Sustentable de Nacións Unidas. Neste caso, concretamente ao 15: Vida de ecosistemas terrestres.
Kappa e o RC Deportivo puxemos en marcha a campaña: "Unha camiseta, unha árbore". Con ela comprometémonos a plantar unha árbore por cada camiseta do modelo Galicia Verde que se vendese a través das DéporTiendas ao longo da temporada. Cada camiseta vendida de Galicia Verde significa unha árbore plantada nas provincias de Galicia máis afectadas os incendios de verán. A esta acción súmase Hijos de Rivera coa súa marca Cabreiroá para facer posible unha gran actividade de repoboación de árbores nunha das zonas do noso territorio máis afectada polos incendios.
En consecuencia, desde a Fundación RC Deportivo pomos en marcha esta acción de reforestación na que queremos que sexa unha gran xornada familiar, festiva, Deportivista e co obxectivo de impulsar o valor da conservación ambiental. Grazas á colaboración do Grupo Naturalista Hábitat o vindeiro sábado 4 de marzo na zona de Laza (Ourense), todas as persoas que participen nesta actividade axudarían a reforestar a nosa contorna natural con case 900 árbores de especies autóctonas cun obxectivo tan fundamental como o de producir o osíxeno necesario para os seres vivos que habitamos o Planeta.
Animamos a todas as persoas, familias, nenas e nenos a participar nesta gran actividade en favor do noso medioambiente. Non debes ter coñecementos específicos, tan só boa actitude e ganas de axudar, aprender do noso medioambiente e divertirte.
A actividade inclúe: Desprazamento desde A Coruña, tentempé, materiais necesarios para a plantación, comida e seguro de Responsabilidade Civil.
Se desexas participar, ou calquera outra persoa que coñezas e que lle poida apetecer, soamente debes contestarnos a este correo electrónico indicando o teu nome, apelidos e DNI antes do próximo mércores 1 de marzo ás 14:00 horas ao correo de fundacion@rcdeportivo.es.
Unha vez confirmado remitiremos o calendario concreto da actividade.
Moitas grazas pola túa colaboración participando ou axudándonos a difundir esta acción.
