Nova e apaixonante fin de semana de competición para ANOSACANTEIRA.
Hoxe domingo 13 de abril xogouse un único encontro, o do Xuvenil A en Santa Cruz de Bezana ante o Real Racing Club.
Os pupilos de Miguel Figueira superaron a un dos grandes da categoría por 1-2, con goles de Héctor e Lucas.
Como o RC Celta empatou (2-2) o seu partido ante o Pontevedra CF, os branquiazuis, a falta de 2 partidos, recuperan o liderado da División de Honra: suman 69 puntos por 68 os celestes.
Onte sábado 12 de abril a atención estivo centrada no Fabril, que visitou ao UD Llanera no Estadio Pepe Quimarán da localidade asturiana de Posada de Llanera.
O partido foi unha montaña rusa. Adiantáronse os locais na primeira metade. Carreira foi expulsado no minuto 71. Darío Germil e Bil pon en vantaxe ao filial con dous goles case consecutivos. E empata de penalti o UD Llanera a falta de 5 minutos para o final.
A pesar deste resultado, o Fabril mantén a quinta posición da táboa con 2 puntos de vantaxe agora sobre o UP Langreo, sexto.
En canto ao resto de categorías sobresaíu #ONOSODERBI na División de Honra cadete (foto da noticia) no campo principal de Abegondo.
O partido acabou en empate (1-1) grazas a un gol de Nico no desconto posto que os célticos adiantáronse no marcador ao arrincar a segunda metade.
Con este resultado, o Cadete segue cunha desvantaxe de 5 puntos respecto dos célticos na clasificación.
Ao acabar este encontro comezou o choque da División de Honra infantil entre o Dépor e o AJ Lérez, no campo de herba artificial. Os deportivistas impuxéronse por 2-1 con dobrete de Thiago.
Fóra de casa xogaron o San Tirso SD Cadete en Vilagarcía ante o Arosa SC (2-1) e o San Tirso SD Infantil en Vigo ante o CD Areosa (1-4) cos dous equipos 'verdes' na sexta posición da División de Honra.
Completou a xornada o triunfo por 2-4 do Alevín A ante o Atlético Perillo correspondente á Fase polo Título da Primeira A Coruña de fútbol 8. Os deportivistas lideran o grupo con 9 puntos de 9 posibles.
Finalmente, non tiveron competición esta semana o Xuvenil B e o Fabril FC Alevín, cuxos partidos correspondentes a esta xornada disputáronos xa este mércores e martes respectivamente; o Alevín de fútbol 11, cuxo partido ante o CD Calasanz xogarao o vindeiro mércores 23 de abril; e os dous equipos benxamíns, á espera da Fase Intermedia do Campionato Galego.
Os resultados da fin de semana foron os seguintes:
Segunda Federación
31ª xornada: UD LLANERA 2 - FABRIL 2 (Darío Germil e Bil)
Categoría xuvenil
División de Honra, 28ª xornada: REAL RACING CLUB 1 - XUVENIL A 2 (Héctor e Lucas)
Categoría cadete
División de Honra, 26ª xornada: CADETE 1 (Nico) - RC CELTA 1
División de Honra, 26ª xornada: AROSA SC 2 - SAN TIRSO SD CADETE 1 (Nico Giovanni)
Categoría infantil
División de Honra, 24ª xornada: INFANTIL 2 (Thiago -2-) - AJ LÉREZ 1
División de Honra, 24ª xornada: CD AREOSA 1 - SAN TIRSO SD INFANTIL 4 (Mario -2-, Hugo Macedo e Ruy)
Categoría alevín
Trofeo Conservas Calvo de fútbol 11, grupo norte, 7ª xornada: CD CALASANZ - ALEVÍN, o mércores 23 de abril ás 19:15 en Abegondo (campo de céspede artificial)
Fase polo Título da Primera A Coruña de fútbol 8, 4ª xornada: ATLÉTICO PERILLO 2 - ALEVÍN A 4 (Nico Rodríguez-Ponce -2-, Miguel Candal e Hugo Quintela)