Un total de sete canteiráns adestráronse esta mañá ás ordes de Fernando Vázquez. A Juan Rodríguez e o meta Pablo Brea, que xa traballaron onte luns na volta ao traballo do primeiro equipo, uníronselles hoxe Manu Mosquera, Trilli, Guille Bueno, Iván Guerrero e Barba.
Todos eles superaron satisfactoriamente a proba de COVID-19 consistente nun test de antígenos; e, por conseguinte, están tamén habilitados segundo o protocolo sanitario para competir na Copa de SM O Rei deste mércores 6 de xaneiro en ABANCA-RIAZOR ante o Deportivo Alavés (19:00 horas).
Na sesión desta mañá, após un quecemento e un circuíto de forza, Fernando Vázquez dispuxo unha serie de exercicios tácticos, algún específico para atacantes e defensas. Unha tarefa de posesión e un partido a metade de campo 2 puxeron o punto e final ao traballo sobre o céspede.
Bóveda e Derik alternaron tarefas co grupo e outras xa adaptadas ás molestias musculares que sofren. Tamén tiveron traballo específico entre o ximnasio e o céspede Keko, Héctor, Borja Granero, Claudio Beauvue e Miku; ademais de Gandoy e Adri Castro, estes dous no seu domicilio.
Finalmente, Uche está de permiso e Borja Galán protagonizou o contratempo do día, ao retirarse do céspede a metade da mañá con molestias no bíceps femoral, pendente de avaliación médica nas próximas horas.
Mañá mércores, o cadro está citada de novo ás 10:30 en Abegondo.
