A Cidade Deportiva de Abegondo está xa preparada para recibir este luns 8 de xullo a Os Nosos, que pasarán as probas médicas e físicas rutineiras e que serven como preámbulo para o inicio da pretemporada o mércores 10 de xullo.
Aínda que segue en marcha a profunda reforma da Cidade Deportiva, que a converterá en referencia a nivel nacional e internacional cun importante investimento, o Dépor xa poderá gozar dunhas modélicas instalacións: ximnasio, comedor, sala de fisioterapia, campos de fútbol con céspede novo...
Así, a campaña 2023-24, con grandes resultados deportivos, baseouse xa nunha serie de medidas concretas tanto a nivel colectivo como a nivel individual orientadas á profesionalización e en busca do máximo rendemento na Cidade Deportiva.
Por exemplo, Abegondo xa dispuxo a temporada pasada de comedores para o Dépor e o Dépor ABANCA con nova cociña orientada a mellorar a nutrición e cun novo proceso de petición de comidas co fin de reducir os desperdicios e mellorar custos.
A Cidade Deportiva é unha peza crave no plan estratéxico do RC Deportivo e os futbolistas branquiazuis poderán empezar a gozala desde mañá mesmo.
