Primeira semana do mes de abril e sen competición para o Dépor ABANCA a consecuencia dos compromisos das seleccións nacionais.
Fran Alonso, en rolda de prensa en Lezama após concluír o encontro ante o Athletic, subliñou que "hai que tentar cargar as pilas. Este parón ás veces pódeche vir ben ou mal. A min cando hai unha derrota gústame xogar o máis rápido posible para conseguir unha vitoria e recuperar sensacións".
Admite que estes días sen liga "pódenos axudar a recuperar pernas cansas que temos, unir ao grupo e afrontar os 6 partidos que quedan con máximas garantías de cumprir o noso obxectivo".
Os resultados da última xornada, coa derrota ante o conxunto vasco, deixa ás Nosas con 23 puntos na 13ª posición da Liga F.
"Imos sufrir todos os equipos. Estamos preparadas para loitar até o último partido de liga. Estamos nunha posición mellor da que estabamos fai 10 xornadas. Temos só 2 derrotas, esta (a de Lezama) é a 1ª fóra de ABANCA-RIAZOR en toda a segunda volta. Estamos nunha fase de crecemento, en boa dinámica", manifestou Fran Alonso.
A pesar de non ter partido, As Nosas completarán desde mañá mércores 2 de abril 3 sesións de traballo no campo 5 de Abegondo a partir das 10:40, con almorzo xa na propia instalación ás 8:50 e comida ao concluír o traballo.
A planificación semanal, sempre susceptible de sufrir variación por razóns técnicas, é a seguinte:
Mércores 2 de abril
10:40 h.
Xoves 3 de abril
10:40 h.
Venres 4 de abril
10:40 h.
Sábado 5 de abril
Descanso
Domingo 6 de abril
Descanso
