O RC Deportivo activa a distribución de entradas para o histórico partido do próximo mércores 9 de febreiro ás 19:00 h. no Estadio ABANCA-RIAZOR entre o RC Deportivo e o Dynamo de Kiev, encontro de oitavos de final, eliminatoria a partido único, da UEFA Youth League.
Para achegar o máximo posible a todo o público e arroupar aos xogadores Deportivistas, e como xa se fixo nos históricos partidos anteriores, inicialmente só se habilitará o anel inferior do Estadio ABANCA-RIAZOR.
Todas as socias e socios do Deportivo poderán dispor de entrada gratuíta para o partido, que será obrigatoria para acceder ao Estadio, non sendo posible empregar o carné para o acceso. Todas aquelas persoas abonadas que desexen retirar unha localidade de calquera das bancadas habilitadas: Tribuna Inferior, Marathón Inferior, Preferencia Inferior ou Pavillón Inferior, poderán solicitar e escoller a súa entrada correspondente en https://bancada.rcdeportivo.es
A través desa páxina, após identificarse coa súa ID de Socia/ou e os 4 últimos números do DNI, a persoa abonada poderá seleccionar calquera asento dispoñible -marcado en verde na aplicación- que desexe escoller para a súa entrada.
Con eses mesmos datos doutras persoas socias, unha única persoa pode retirar máis dunha entrada nunha soa xestión e, deste xeito, seleccionar asentos próximos.
Se non se ten carné do Dépor e quérese asistir ao partido tamén é posible comprar entradas. O prezo único é de 5 euros. A compra de entradas para o partido realízase tamén a través da páxina: https://bancada.rcdeportivo.es
Seguindo as indicacións que publicou a Consellería de Sanidade da Xunta de Galicia e que expresamente trasladou ao RC Deportivo, informamos a todas as persoas que vaian acudir o vindeiro mércores ao Estadio ABANCA-RIAZOR con motivo do partido de UEFA Youth League do seguinte:
Como consecuencia da publicación no DOG o 17 de decembro de 2021 (nº 241), da Orde da Consellería de Sanidade da Xunta de Galicia, de 14 de decembro de 2021, pola que se establecen medidas preventivas de seguridade sanitaria consistentes na exhibición de documentación que acredite o cumprimento de determinados requisitos para o acceso a certos establecementos e prorróganse diversas ordes como consecuencia da evolución da situación epidemiolóxica derivada da COVID-19 en Galicia, o RC Deportivo de La Coruña, SAD vese obrigado a esixir a todas persoas maiores de 12 anos para acceder ao estadio ABANCA-RIAZOR, a seguinte documentación, ademais do seu DNI, un dos documentos aos que se refiren os seguintes ordinais:
1º. Certificado de vacinación (en formato papel ou en formato dixital) acreditativo de que recibiron a pauta completa dunha vacina contra a COVID-19 para a que se concedeu autorización de comercialización na Unión Europea (BioNTech, Pfizer; Johnson & Johnson; Moderna; Novavax; Oxford, AstraZeneca).
2º. Que dispoñen dunha proba diagnóstica negativa realizada nas últimas 72 horas, no caso de PCR, e 48 no caso do test de antíxenos. No caso do test rápidos de antíxenos, deberán estar enumerados na lista común e actualizada de test rápidos de antíxenos da COVID-19 establecida sobre a base da Recomendación 2021/C 24/01, do Consello de Europa (consultar lista).
3º. Que a persoa se recuperou dunha infección polo SARS-CoV-2 nos últimos 6 meses. Para iso a persoa deberá ser diagnosticada como caso confirmado da COVID-19 hai 11 días ou máis mediante unha proba PCR, non sendo válido outro tipo de test.
NON PODERÁN ACCEDER AO ESTADIO ABANCA-RIAZOR as persoas maiores de 12 anos que non acheguen algún dos documentos sinalados anteriormente, para que o persoal do Club poida realizar a comprobación á que vén obrigado legalmente.
Debido ás esixencias da norma e ás comprobacións que temos que realizar, é posible que se retarde o acceso ao Estadio, polo que suxerimos que se acuda con polo menos 30 minutos de antelación, e infórmase que desde as 18:00 horas será posible acceder a ABANCA-RIAZOR.
