Denis Genreau foi o protagonista esta mañá na sala de prensa de Abegondo.
O futbolista francés admite que "houbo moitos cambios" na súa vida diaria pero "as instalacións son moi boas. Hai que adaptarse aos adestramentos, aos desprazamentos".
Mostrouse "moi contento" pola súa primeira titularidade, o pasado luns no Estadio SkiFi Castalia ante o CD Castellón. "Estou a adestrar duro desde que cheguei, coñecendo aos compañeiros e a maneira de xogar. Estou moi contento por xogar de inicio sabendo que foi un partido moi difícil", engade.
Pensa que "podo mellorar. Non foi o meu mellor partido pero cando non xogas ben como equipo e a nivel individual o importante é traballar duro, defender ben e traerse 1 punto".
Após chegar no mercado de inverno, afirma que "todos os futbolistas queremos xogar inmediatamente pero hai que ter paciencia para adaptarse. Tiven varias charlas co míster e cos meus compañeiros para ver cal sería o meu papel. Canto máis tempo pasa, máis cómodo sinto e espero poder xogar cada vez máis para axudar ao equipo".
Genreau explica que "cando chegas a un equipo ás veces o teu papel cambia un pouco. Após as conversacións co míster o meu rol é claro, no dobre pivote, como número 8, axudar en defensa e conectar cos atacantes".
Cre que "podo mellorar nese último pase coa dianteira. En Francia o fútbol é máis técnico e aquí, por exemplo o outro día, viuse un partido moi físico".
Preguntado polas arbitraxes, confesa que "non lle prestei moita atención. O que quería era axudar ao equipo e estaba centrado niso. O seu papel é difícil porque as decisións que teñen que tomar son difíciles. Temos que respectalas. Ás veces son boas, ás veces son malas pero fano o mellor que poden".
Co partido ante o FC Cartagena en ABANCA-RIAZOR este domingo 23 de marzo ás 18:30 (LaLiga TV Hypermotion) lembra que o Dépor "acaba de ascender por tanto é máis difícil. En ABANCA-RIAZOR, con #ANOSAFORZA, temos que mellorar os resultados, temos a responsabilidade de facelo ben e esperemos conseguir máis puntos porque os afeccionados o merecen".
Finalmente Denis Genreau recalca que "nunca é fácil chegar a un equipo novo pero teño sorte que os meus compañeiros me axudan. O meu último partido de titular foi a finais de xaneiro (no Toulouse FC). Foron un par de meses pero sentín ben, podo dar moito máis a medida que colla ritmo de partido. Teño que continuar traballando duro porque o meu mellor nivel está por chegar".