O Dépor ABANCA mídese mañá domingo 30 de marzo ás 12:00 (Dazn, Gol Play e TVG) en Lezama a un dos históricos do fútbol español, o Athletic Club, empolicado ademais aos postos de privilexio na Liga F.
As Nosas, co empate en ABANCA-RIAZOR ante o UD Costa Adeje Tenerife Egatesa, ocupan a 13ª posición con 23 puntos mentres que as branquivermellas suman 41 puntos na 4ª praza.
Fran Alonso subliñou na sala de prensa que está "contento coa aplicación do equipo" nunha semana longa de adestramentos previa ao encontro.
O técnico deportivista asegura que "o plan de partido témolo moi claro. Os adestramentos reflectiron que hai moita concentración, moitas ganas de facelo ben".
Aínda que advirte que o Athletic Club "é un gran equipo que está na parte alta da táboa, cremos nas nosas posibilidades e iremos tentar traer un resultado positivo".
O Dépor ABANCA conta "coas mesmas baixas. Cris Martínez non está a adestrar co grupo, Henar operouse o mércores (dunha desinserción cápsulomeniscal no seu xeonllo dereito). Todo saíu moi ben. Xa empezou o proceso de volta. Este ano non poderemos contar con ela pero temos moitas ganas de que volva co grupo. É unha xogadora moi importante para nós. E Carmen Carballada está cada vez máis integrada co grupo. Está a adestrar máis e espero que pronto poida facelo sen limitacións. O resto igual ou sexa que as mesmas que a semana pasada", según apuntou Fran Alonso.
Nesta semana ademais o vestiario celebrou a renovación de Vera Martínez até xuño de 2026 e a nova convocatoria de Ainhoa Marín coa selección española sub-23 para un amigable ante Inglaterra en Murcia o xoves 3 de abril; e ante Bélxica ou Suecia o domingo 6 tamén en Murcia.
Athletic Club e Dépor ABANCA víronse as caras na primeira volta en ABANCA-RIAZOR o 28 de setembro. Houbo empate (2-2) con goles deportivistas de Olaya e ADT.
En Lezama esta temporada o conxunto vasco gañou ao Granada CF (2-1), Real Betis Féminas (3-0), Madrid CFF (1-0), Levante Badalona FC (1-0) e Real Sociedad (2-0); empatou coa Valencia Féminas CF (1-1); e caeu co Atlético de Madrid (0-2), FC Barcelona (0-2), SD Eibar (0-1), Real Madrid CF (1-2) e Sevilla FC (0-1).
O Dépor ABANCA realizou esta mañá a última sesión de adestramento antes de partir en autocar a Bilbao con esta folla de ruta:
Sábado 29 de marzo
10:30: Adestramento en Abegondo
12:45: Saída en autocar a Bilbao
19:30 (horario aproximado): Chegada ao hotel Occidental Bilbao
Domingo 30 de marzo
12:00: Athletic - Deportivo ABANCA, en Lezama
Ao concluír, regreso en autocar á Coruña
Finalizado o encontro, As Nosas adestraranse de novo en Abegondo o luns 31 de marzo a partir das 11:00 horas para arrincar unha semana sen competición.
