O Fabril caeu esta tarde (3-1) en O Vao co Coruxo FC en partido correspondente á 29ª xornada no grupo 1º de Segunda Federación.
"Hoxe non estivemos desde do principio. Desde a primeira xogada gañáronnos os duelos, metéronnos na nosa área. Foi un partido no que eles tiveron máis tensión competitiva que nós e custounos moito", declarou Manuel Pablo na sala de prensa.
O técnico lembra "unha vez que nos remataron 5 veces porque estabamos desactivados. E con balón non atopamos as opcións".
Con este resultado, o filial queda con 44 puntos na 5ª posición da táboa, á espera do que faga o Bergantiños CF (6º con 42) mañá domingo en As Eiroas ante o Pontevedra CF.
O Fabril non puido contar con Samu e Mardones, co primeiro equipo na Malata; nin con Noé e Pablo García, lesionados.
O partido arrincou da peor forma posible. Naveira recibe en banda esquerda e mete un balón ao espazo. Álex Pérez colle as costas á defensa fabrilista, regatea a Alberto á súa saída e marca a pracer. Corría o minuto 2.
Tentou reaccionar o filial, que non conseguía pór en perigo a meta do Coruxo FC.
De feito, o meta deportivista Alberto viuse obrigado a intervir nun par de ocasións viguesas.
Con todo, logrou empatar o Fabril aos 38 minutos. Kevin Sánchez métese na área viguesa aínda que taponado por varios defensas. O rebote chégalle a Alfaro, que controla ben e bate a Alberto de tiro raso.
Nos instantes finais, o colexiado do encontro, o rioxano Morato Vega, sinalou un discutido penalti de Alfaro a Serrano ao apreciar agarrón do fabrilista. O propio Serrano anotou o lanzamento aínda que Alberto a punto estivo de despexar.
Con este resultado chegouse ao descanso.
Manuel Pablo moveu pezas buscando un cambio de rumbo e deu entrada a Mane e Luisao.
Precisamente este último xutou ao poste nunha xogada que supuxese o empate. Saíu o Fabril disposto a darlle a volta ao choque.
No entanto, aos poucos o Coruxo FC logrou equilibrar de novo o partido.
"A sensación é que nunca estivemos", asumiu o preparador fabrilista.
O partido quedou sentenciado cun gol desgraciado aos 77 minutos. Alfaro cede ao seu porteiro Alberto sen darse conta de que estaba adiantado e marca en propia meta de vaselina.
"Ese terceiro gol foi xa o colmo. Custounos moito porque non estivemos nunca cómodos na circulación, nas vantaxes e mereceron o resultado", concluíu Manuel Pablo.
O vindeiro sábado 5 de abril ás 17:00 (Youtube RC Deportivo) o Fabril recibe en Abegondo ao Bergantiños CF.
Coruxo FC: Alberto, Borja, Andriu, Guido (Brais Penela, min. 63), Willy Ibáñez, Álex Pérez (Araújo, min. 81), Serrano (Álex Rey, min. 63), Añón, Naveira, Terranova (Nacho Fariña, min. 50) e Borja Domínguez (Hugo Rodríguez, min. 81)
Fabril: Alberto, Mario Hermo (Mane, min. 46), Damián Canedo, Marotías, Íker Vidal (Bil, min. 67), Carreira (Jaime Garrido, min. 61), Alfaro, Guerrero, Manu Ferreiro (Darío Germil, min. 71), Fabi (Luisao, min. 46) e Kevin Sánchez
Árbitro: Juan Francisco Morato Veiga, do comité rioxano. Amoestou a Willy Ibáñez (min. 53), Guerrero (min. 65), Jaime Garrido (min. 67) e Araújo (min. 84)
Goles: 1-0 Álex Pérez (min. 2); 1-1 Alfaro (min. 38); 2-1 Serrano, de penalti; 3-1 Alfaro, en propia porta (min. 77)
Incidencias: partido correspondente á 29ª xornada no grupo 1º de Segunda Federación disputado en O Vao