O Fabril venceu (0-1) este mediodía ao UM Escobedo no Estadio Eusebio Arce da localidade cántabra de Escobedo de Camargo.
Decidiu o choque un gol de Alfaro no minuto 88 instantes despois de que o cadro local quedase cun xogador menos por expulsión de Cagigal con vermella directa.
Con este resultado, o filial deportivista suma 37 puntos situado na 4ª posición do grupo 1º de Segunda Federación; e a falta do partido aprazado no seu día ante a SD Compostela que se xogará o vindeiro mércores 19 de marzo ás 20:30 no Estadio Vero Boquete de San Lázaro.
No Fabril foron baixa por lesión Aarón, Luisao, Noé e Pablo García, este a consecuencia dunha escordadura de nocello sufrido a pasada fin de semana en Abegondo ante o CD Marino de Luanco.
Manuel Pablo advertira da dificultade do choque nun campo máis curto (90 metros de longo) e ante un equipo que, sen contar o partido da pasada fin de semana en Pontevedra, levaba 8 partidos sen perder e coa portería a cero.
Saíron os cántabros ben ao partido, apertando arriba ao Fabril e apropiándose da pelota.
Aos poucos o filial foi sacudíndose ese dominio e atreveuse a achegarse á área do meta Laro Gómez.
Mane, situado en banda dereita, foi o primeiro en probar fortuna. O seu disparo atallouno o porteiro cántabro.
De Kevin Sánchez foi a segunda, tamén a pase de Mane, sen dúbida o futbolista máis perigoso neste tramo inicial.
O UM Escobedo puido adiantarse no marcador nun remate de Morales que sacou ben Hugo Ríos, hoxe porteiro do Fabril en substitución de Alberto.
Con igualdade máxima chegouse ao descanso.
A segunda parte seguiu coa mesma tónica: máxima igualdade e escasas ocasións.
Pero no tramo final abriuse o partido para o Fabril, que si logrou atopar os espazos.
A 10 minutos para o final, Cagigal realiza unha fea entrada sobre Fabi e ve o cartón vermello directo a cargo do colexiado castelán-leonés David García Presa.
O filial atopou o espazo no minuto 88, nunha boa acción persoal de Kevin Sánchez que remata á rede Alfaro.
Sen apenas tempo para reaccionar e cun futbolista menos, o encontro acabou con triunfo fabrilista.
O vindeiro domingo 9 de marzo ás 12:00, o Fabril recibe en Abegondo ao Rayo Cantabria.
UM Escobedo: Laro Gómez, Mario Bastante (Izam, min. 68), Fermín, Morales, Mateo (Somaza, min. 81), Raúl Tresgallo, Cagigal, Juan Casar (Nacho, min. 6), Aarón (Jay Romeu, min. 68), D. Espinosa e Brayan
Fabril: Hugo Ríos, Mardones, Damián Canedo, Marotías, Íker Vidal, Alfaro, Fabi (Darío Germil, min. 85), Carreira (Jaime Garrido, min. 66), Kevin, Mane (Guerrero, min. 66) e Bil (Manu Ferreiro, min. 75)
Árbitro: David García Presa, do comité castelán-leonés. Amoestou a Espinosa (min. 7), Damián Canedo (min. 20), Óscar Marotías (min. 28) e Somaza (min. 90). Expulsou con vermella directa a Cagigal (min. 80).
Gol: 0-1 Alfaro (min. 88)
Incidencias: partido correspondente á 25ª xornada no grupo 1º de Segunda Federación disputado no Estadio Eusebio Arce