Óscar Gilsanz cre que partidos como o do FC Cartagena "non se poden xogar mirando cara á clasificación porque equivocariámonos"
Óscar Gilsanz advertiu esta mañá na sala de prensa de Abegondo que partidos como o deste domingo 23 de marzo ás 18:30 (LaLiga TV Hypermotion) en ABANCA-RIAZOR ante o FC Cartagena "non se poden xogar mirando cara á clasificación porque equivocariámonos. Se o xogas mirando á táboa estás a cometer un erro importante".
Lembra que o futbolista "é profesional e sabe que calquera equipo che pode gañar".
O técnico deportivista admite que o FC Cartagena "vén cunha xeira mala de resultados pero a SD Huesca pasou por aquí con 13 ou 14 partidos sen perder e perdeu 1-0 en Tenerife. Pois a SD Huesca perdeu co FC Cartagena. Perdeu 6 puntos con Tenerife e Cartagena".
Pensa que estes datos reflicten "a igualdade que ten a categoría" e apunta que o cadro do FC Cartagena "está formada por futbolistas de Segunda División, por cedidos de equipos importantes de Primera División e que fan moitas cousas ben".
No entanto, Óscar Gilsanz sostén que "o máis importante somos nós porque vimos dun partido no que todos criamos que podiamos facer algo máis e vai depender de nós. Se estamos ben, temos moito ganado. Respectamos moito ao FC Cartagena porque o seu cadro está formada por xogadores de Segunda e cedidos de equipos de Primera; e porque ademais os seus partidos son máis igualados do que indica a xeira de resultados que ten. Por todo iso esperemos un partido igualado, no que temos que dar nosa mellor versión, e pensar en que o noso rendemento individual e colectivo sexa o mellor".
