O Deportivo comezou o ano sumando tres puntos vitais en ABANCA-RIAZOR grazas ao gran traballo coral, resumido en dous goles de Lucas na primeira metade e unha defensa heroica durante a última media hora cun xogador menos ante unha Real Sociedad B que non coñecía a derrota fóra do seu campo.
Imanol Idiakez, adestrador branquiazul, repetiu o once inicial que presentou no último partido de 2023, na vitoria fronte ao CD Arenteiro en Espiñedo (1-2).
O partido arrancou de maneira inmellorable. O Deportivo adiantouse no marcador no minuto 3. Yeremay buscou e atopou cun balón en profundidade a Lucas, que recortou ao porteiro sobre a súa saída e case sen ángulo levou o esférico ao fondo das mallas.
No minuto 8, Pablo Vázquez cabeceou alto un córner colgado por Lucas. Pouco antes do cuarto de hora, chegou o primeiro remate visitante, nunha cabezada de Goti chegando desde atrás a centro desde o extremo esquerdo que se foi por riba do traveseiro.
Corría o minuto 20 cando Balenziaga capturou o rexeite da zaga visitante nun córner e atopou completamente só a Lucas, que viña de lanzar o saque de esquina, no extremo esquerdo. O '7' disparou con dureza, raso en busca do primeiro pau, pero Ayesa non se venceu e coa perna dereita desviou a pelota a un novo córner.
Non puido ampliar a vantaxe Lucas naquela ocasión, pero si o fixo oito minutos despois. Un novo pase en profundidade, nesta ocasión de Davo, atopou a Lucas, que gañou por velocidade aos centrais donostiarras. O dianteiro tratou de regatear a Ayesa pisando a pelota, pero o gardameta rozou o coiro e este volveu caer a pés do '7', que á media volta coouno na portería a pesar de que o porteiro chegou a tocalo.
Un plácido tramo final da primeira parte e inicial da segunda veu abaixo co tanto de Magunazelaia no minuto 55. O filial realista recuperou un balón en tres cuartos de campo, Magunazelaia encarou a Pablo Vázquez, buscou o seu perfil bo e á entrada da área colocou o esférico coa dereita no pau máis afastado, fóra do alcance de Germán.
A Real Sociedad B viuse ante o seu momento e o técnico Sergio Francisco ordenou un triplo cambio que case forneceu efecto de inmediato. No minuto 63, Ekain bateu a Germán pero o colexiado anulou o tanto por fóra de xogo.
Cinco minutos despois, o panorama complicouse aínda máis para o Deportivo, xa que Jose Ángel viu a segunda cartolina amarela após agarrar o balón no chan despois de lesionarse, posto que o colexiado non detivera o xogo.
Con todo, os branquiazuis puideron aumentar a súa vantaxe no minuto 78, nunha falta escorada que Lucas tirou directa por baixo, Ayesa non puido atrapar pero Pablo Vázquez non puido remachar xa que o porteiro mandou o coiro a córner cos pés.
A Real Sociedad B dominou pero tampouco creou oportunidades excesivamente claras. O remate máis próximo ao empate produciuse no minuto 88, nunha cabezada de Jon Martin nun córner que se foi rozando o pau dereito da meta herculina.
O colexiado decretou 8 minutos de tempo engadido, aos que sumou outro máis despois de transcorrido minuto e medio, baixo a reprobación de ABANCA-RIAZOR. Con todo, os branquiazuis souberon capear o temporal, conter as arremetidas visitantes e afastar o perigo até o asubío final no minuto 90+9.
Con esta vitoria, o Dépor alcanza os 29 puntos despois de 18 partidos, a só un da última posición de playoff, que ocupa precisamente o seu rival de hoxe. O conxunto branquiazul acumula 7 xornadas sen coñecer a derrota, nas que sumou 4 vitorias e 3 empates, ou o que é o mesmo, 15 puntos dos últimos 21.
RC Deportivo: Germán, Paris Adot (Ximo Navarro, min. 75), Pablo Vázquez, Pablo Martínez, Balenziaga, Jose Ángel, Salva Sevilla, Diego Villares (Hugo Rama, min. 65), Davo (Rubén López, min. 70), Lucas e Yeremay (Mella, min. 75).
Real Sociedad B: Ayesa, Iñaki Rupérez (Jon Mikel Aramburu, min. 61), Jon Martin, Cantero, Unax Agote (Zoilo, min. 61), Gorrotxategi, Luken Beitia (Mikel Rodríguez, min. 76), Goti (Ekain Azkune, min. 61), Marín, Bryan Fiabema (Dadie, min. 76) e Magunazelaia.
Goles: 1-0 Lucas (min. 3); 2-0 Lucas (min. 28); 2-1 Magunazelaia (min. 55).
Árbitro: Alberto Fuente Martín (c. cántabro). Expulsou por dobre amarela a Jose Ángel (min. 68) e á conclusión do encontro mostrou a vermella directa ao adestrador de porteiros visitante Luis Castro. Cartón amarelo a Gorrotxategi (min. 50), Jose Ángel (min. 52), Luken Beitia (min. 58), Zoilo (min. 77), Jon Mikel Aramburu (min. 80), Jon Martin (min. 81), Rubén López e Dadie, ambos os dous á conclusión do partido.
Incidencias: partido correspondente á 18ª xornada do Grupo 1 de Primera Federación disputado no Estadio ABANCA-RIAZOR ante 19.715 espectadores.
