ABONOS #DÉPOR2324
Deportivistas,
após unha temporada na que a vosa ilusión e empuxe foi, un ano máis, o principal motor do Club, queremos profundar nos cambios levados a cabo a pasada campaña e que supuxeron ampliar a franxa de idade para que as nenas, nenos e rapaces do Dépor tivesen máis alcanzable o poder acudir á Nosa Casa a animar a todos os nosos equipos.
Por iso, neste novo ano queremos ir un paso máis aló e ampliar, en cinco anos máis, a franxa de idade de abonos bonificados. Para esta campaña 2023-2024 creamos o abono Sub 30, favorecendo así á parte central da nosa pirámide de persoas abonadas, a aqueles Deportivistas que ao cumprir os 25 anos pasaban a pagar o carné completo.
Non só creamos a figura de Abono Sub 30 senón que aumentamos o desconto para os abonos Sub 25, favorecendo a un maior número de Deportivistas entre os 15 e os 25 anos.
Nesta política de seguir facendo do fútbol un espectáculo o máis accesible posible a toda a sociedade, segmentamos a bancada de Tribuna creando os abonos de Tribuna Córner, achegando o prezo da bancada principal do Estadio aos dos fondos e poñendo máis asentos de primeira categoría a disposición dun maior número de afeccionados. Ademais, como promoción de lanzamento, esta nova bancada terá os mesmos prezos que os córneres de xusto enfronte, os de Preferencia.
Coa política de prezos aplicada esta temporada, por todos os partidos de Liga do Dépor e o Teresa Herrera en ABANCA-RIAZOR, os prezos por partido dos abonos oscilan entre os 2,25 e 22,5 euros, cantidade que diminúe se se xogan partidos de Copa do Rei en casa ou se se acode a Abegondo a animar, sen custo adicional, ao Dépor ABANCA, ao Fabril ou ao Xuvenil.
Esta é a nosa forma de darvos as grazas por conseguir, un ano máis, bater todas as marcas: grazas aos 25.556 Deportivistas que sacastes o voso carné a temporada pasada, grazas aos 28.828 que marcastes a maior asistencia da historia a un partido da categoría, grazas ás 390.649 persoas que ao longo de todos os partidos demostrastes sen descanso por que sodes A Nosa Forza.
Deportivistas, estamos a desexar volver vervos en casa!
DESCARGA A APP DO DÉPOR!
A única forma de ter o teu carné do Dépor (e até outros 4 vinculados) no teu móbil
Toda a info do Club ao instante
Rexístrate cos teus datos e empeza a gozala desde xa
Se te rexistras cos teus datos de persoa socia poderás completar o proceso de renovación do teu abono
Máis información en www.rcdeportivo.es/gl/app.
Ademais de online, tamén podes renovar mediante transferencia
Realiza un ingreso na conta do RC Deportivo:
ABANCA ES72 2080 0063 42 3040031088
Renova o abono indicando nome, apelidos e DNI da persoa abonada. Para formalizar a renovación, un requisito imprescindible é enviar un correo electrónico a atencion.deportivista@rcdeportivo.es achegando o xustificante bancario, copia do DNI, sinalando os datos da persoa abonada ou abono, a dirección postal se desexas que che enviemos o carné físico e indicando no asunto "Renovación por transferencia". Procederase a comprobar tanto a transferencia bancaria como os datos, e, posteriormente, farase efectiva a renovación respondendo o correo electrónico desde a Oficina de Atención ao Deportivismo (OAD). Lembra que en caso de solicitar o carné físico debes engadir 3 euros á tarifa do teu abono na transferencia e indicar que SI desexas o carné físico.
Renovación presencial, só con cita previa e a partir do 26 de xullo
Exclusivamente atenderase baixo cita previa desde o 26 de xullo para atender presencialmente, na Oficina de Atención ao Deportivismo (OAD) do Estadio ABANCA-RIAZOR: avenida da Habana s/n, 15011 A Coruña, a aquelas persoas abonadas que non puideron realizar o trámite de maneira online ou por transferencia por algunha causa de forza maior. A única vía para solicitar a cita será mediante a plataforma web citaprevia.rcdeportivo.es. Todas as persoas que non soliciten cita previa a través desta plataforma non poderán ser atendidas.
OFICINA DE ATENCIÓN AO DEPORTIVISMO (OAD)
Primeira fase da campaña exclusivamente online.
Desde o 26 de xullo atenderase tamén presencialmente, só con cita previa, en citaprevia.rcdeportivo.es.
Dirección: avenida da Habana, s/n 15011 A Coruña
Correo electrónico: atencion.deportivista@rcdeportivo.es
Teléfono: 981 259 500 Extensión 1