Catro futbolistas coruñeses, Álex Bergantiños, Trilli, Aroa Guerra e Carlota Sánchez, pecharon o círculo e fixeron de Reis Magos branquiazuis no Hospital Materno Infantil Teresa Herrera da Coruña, onde naceron.
Despois de varios anos suspendida por mor da pandemia, a Fundación RC Deportivo retomou esta actividade que sempre está marcada en vermello no calendario de #ANOSAFORZA.
Bufandas, gorros, peluches... foron algunhas das sorpresas de Os Nosos e As Nosas para os nenos e nenas que teñen que pasar estes días tan festivos entre médicos, enfermeiras e tratamentos.
Todos eles tiveron o seu agasallo, até os pacientes que estaban en réxime de illamento a consecuencia das infeccións respiratorias tan comúns nestes tempos.
Coas precaucións lóxicas de máscara e distancia de seguridade, os futbolistas non dubidaron en pararse en cada habitación para axudar a os peques cun sorriso e unha caricia a pasar estes días da mellor forma posible.
Persoal do hospital exerceu de guía e ensinou á representación do Club as modélicas instalacións como aulas, salas de xogo e até un moderno ximnasio.
Xa na planta de neonatoloxía, o xefe da Unidade, o doutor José Luis Fernández Trisac, puido abrazar a Trilli, a quen axudou a saír adiante xunto aos seus dous irmáns hai 19 anos. Médico e futbolista pousaron xunto a unha fotografía tomada xusto cando os tres irmáns, trillizos, recibiron o alta despois de estar ingresados.
Ademais, Trisac, un leonés de Santa María del Páramo pero coruñés de adopción e Deportivista, fomenta o amor polo Dépor xa desde a incubadora.
Cada bebé ingresado na UCI, co seu correspondente pixama hospitalario, loce un gorrito e patucos branquiazuis de punto que a nai do doutor, desde o seu León natal, encárgase de confeccionar ela mesma. Así pois, deportivistas non só desde o berce, senón desde a incubadora.
Este domingo, o doutor Trisac poderá animar ao seu equipo desde o palco de honra de ABANCA-RIAZOR en representación de todos os nenos aos que leva inculcando o amor polas cores branquiazuis.
