Mfulu incorporouse esta mañá con total normalidade á sesión co grupo nunha mañá na que tamén realizaron unha parte co cadro Jose Ángel e Ximo Navarro. Ambos os futbolistas, que avanzan na súa recuperación, continuaron despois cos readaptadores Nando Rodríguez e Alejandro Canosa.
Onte en rolda de prensa, Óscar Gilsanz asegurou que non está a pensar "nos que podo recuperar senón en analizar mentalmente o partido, ver o que podemos corrixir para o traballo semanal e tentar encarar o partido ante o Sporting de Gijón (domingo 24 de novembro ás 16:15 en ABANCA-RIAZOR) coas mellores garantías posibles recuperando xente ou sen recuperar porque todos os xogadores do noso cadro, como vimos, poden competir".
O corpo técnico deportivista dispuxo para todo o cadro unha activación con rondos. A continuación, os titulares onte no UD Almería Stadium pasáronse a tarefas de recuperación.
Para o resto houbo un exercicio de posición, unha tarefa de finalizacións e fútbol reducido para concluír.
Jaime, Lucas, Mella e Yeremay están con adestramento personalizado.
Pola súa banda, Pablo García, Samu, Guerrero, Alfaro, Aarón, Alberto e Kevin Sánchez, que onte en Almería debutou en liga co primeiro equipo, foron os representantes de ANOSACANTEIRA.
Mañá martes hai xornada de descanso. Os Nosos regresan aos adestramentos o mércores 20 de novembro ás 11:00 en Abegondo.
