O Fabril arrincou a segunda volta da liga en Segunda Federación como arrincou a primeira, con derrota pola mínima (neste caso por 1-0 no Estadio Adolfo Suárez) ante o Real Ávila CF e de forma inmerecida, posto que os fabrilistas fixeron tamén hoxe domingo 12 de xaneiro méritos máis que suficientes para polo menos sumar 1 punto.
Decidiu o encontro un tanto polémico de Campos no minuto 29 ao aproveitar unha rápida transición dos abulenses. O atacante local estaba en posición máis que dubidosa, máis adiantado que a pelota, cando recibe un pase de gol dun compañeiro desde a banda esquerda.
Con este resultado, o filial queda con 26 puntos na 8ª posición da táboa en Segunda Federación.
Manuel Pablo puido contar con Kevin Sánchez, que viaxou co primeiro equipo a Málaga onte sábado aínda que non chegou a saltar ao céspede da Rosaleda. O internacional foi titular e das súas botas naceron as ocasións máis claras.
Saíu forte ao encontro o Real Ávila CF, que nos primeiros 7 minutos acumulou 2 chegadas con perigo, a segunda, a disparo de Alberto Martín, obrigou a intervir con acerto a Alberto.
Respondeu no entanto o Fabril cun disparo ao poste de Guerrero.
A seguinte oportunidade foi de Álex Moreno, que recolle un despexe de Alberto na frontal e o seu remate sae lixeiramente alto.
Foi o preámbulo do gol, obra de Campos ao culminar unha rápida contra local.
O partido era moi equilibrado e os fabrilistas acumulaban chegadas á área e ocasións.
O colexiado do encontro, o castelán-manchego Castell Orozco, anulou un gol a Íker Vidal por fóra de xogo. Tampouco houbo fortuna nesta circunstancia.
A primeira metade acabou con outras dúas ocasións de Kevin, sen puntaría ante a meta do Real Ávila CF.
Após o paso polos vestiarios, o Fabril lanzouse a polo empate con Kevin Sánchez como principal argumento ofensivo dos de Manuel Pablo.
Ante o empuxe branquiazul, os casteláns optaron por replegar liñas e esperar a súa ocasión ao contragolpe, táctica que manexan á perfección.
Co paso dos minutos e no carrusel de cambios o Fabril foi perdendo fol en ataque e os 3 puntos quedaron inxustamente en Ávila.
O vindeiro domingo 19 de xaneiro ás 12:00 (YouTube RC Deportivo) o Fabril recibe en Abegondo ao Pontevedra CF.
Real Ávila CF: Álvaro, Carlos Pascual, Adilson, Campos (Vitolo, min. 67), Mario Rivas, Alberto Martín (Deiby, min. 85), César Llopis, Alpha, Adri Carrión, Álex Moreno e Fer Díaz (Toper, min. 44)
Fabril: Alberto, Mardones, Pereira (Damián Canedo, min. 65), Marotías, Íker Vidal, Carreira (Bil, min. 60), Kike Fernández (Jaime Garrido, min. 65), Alfaro, Guerrero (Pablo García, min. 82), Fabi e Kevin Sánchez (Hugo Villaverde, min. 82)
Árbitro: Carlos Castell Orozco, do comité castelán-manchego. Amoestou a Fer Díaz (min. 15), Álex Pereira (min. 21), Campos (min. 47), Álex Moreno (min. 56), Kevin Sánchez (min. 73) e Marotías (min. 90)
Gol: 1-0 Campos (min. 29)
Incidencias: partido correspondente á 18ª xornada disputada no Estadio Adolfo Suárez