Yeremay e Mario Soriano pasáronse pola zona mixta do Estadio da Rosaleda.
O atacante canario admite que leva "un sabor agridoce porque tiñamos o partido xa medio encarrilado e polos detalles empátannos e ímonos a casa con 2 puntos menos".
Lembra que "tivemos varias ocasións para meter o segundo. Lembro unha ou dúas de Mella, dúas miñas que non termino de facer a xogada. Hoxe estivemos ben pero penalizáronnos os pequenos detalles, non estar ben nesa zona de ataque, ese último pase. Voume contento porque a pesar diso fixemos un bo partido en liñas xerais".
Preguntado polo seu futuro, Yeremay asegurou estar "moi contento no Dépor" e deixou claro que "non deixaría o Dépor por calquera cousa. Só iríame para dar un paso máis na miña carreira".
Pola súa banda, Mario Soriano tamén opina que o equipo "fixo moi bo partido, víronse cousas moi boas, tivemos contras para chegar ben á área contraria e ao final faltou o último pase, o último tiro, a definición boa para pornos con 0-2 e ter máis tranquilidade. Nos últimos minutos eles meteron moitos xogadores arriba que nos obrigou a botarnos máis atrás e chegou esa acción do empate".
Apunta que sente contento na posición na que actuou en Málaga, "entre liñas, recibindo cara a adiante, tentando dar o último pase" e lamentouse dunha oportunidade clara na segunda metade, con 0-1, na que "me tropezo co balón. Creo que podía facelo mellor, mesmo acabala antes".
Finalmente o polivalente centrocampista madrileño recalca que "todos queremos sumar os máximos puntos posibles, saír canto antes desta zona (na táboa). Esta segunda volta non empezou mal, o equipo fixo cousas moi boas, púxose por diante e empatáronnos nos últimos minutos. Temos que mellorar eses últimos minutos, que tamén nos pasou en ABANCA-RIAZOR contra o Zaragoza. E no ofensivo as ocasións que teñamos, metelas".