Imanol Idiakez: Hoxe demos un paso adiante de resiliencia, de espírito de equipo, de combatividade, de solidariedade
Imanol Idiakez subliñou na sala de prensa do Toralín que "hoxe demos un paso adiante de resiliencia, de espírito de equipo, de combatividade, de solidariedade, de moitísimas cousas que teñen un valor incalculable, que non se poden medir en puntos".
Advirte que "este equipo está a xerar dentro uns valores, unha forma de actuar, un compromiso, unha solidariedade que ao final nos vai a levar onde queremos, aínda que nos estea custando un pouquiño máis do que queremos este inicio".
Xornada a xornada, lembra que o Dépor "quitando 15 ou 20 minutos da pasada xornada e o desconto en Fuenlabrada ten moito menos do que mereceu. Pode soar a escusa pero é a realidade".
Queda o adestrador branquiazul con que "a pesar de todos os inconvenientes que estamos a ter no camiño, aquí ninguén cae, todo o mundo sóbese ao barco. Hoxe os non convocados lesionados viñeron de maneira voluntaria co equipo para estar a apoiar aos seus compañeiros. Aí dentro estanse formando cousas que están á altura do que hai fóra. Dar as grazas a #ANOSAFORZA porque é un espectáculo. Saír ao banco e ver o que temos aí cada partido. Imos traballar como tolos por darlles alegrías".
Preguntado pola actuación arbitral, Imanol Idiakez asegura que "non me creo o que estou a vivir. Se me din que estou no Deportivo de La Coruña non mo creo. Estamos a ter moi mala sorte desde a xornada uno co gol anulado a Lucas até hoxe. Moi mala sorte".
Iso si, recalcou estar "moi orgulloso do traballo do equipo, con 10 desde o minuto 10, un gol en contra que non se se era fora de xogo, a reacción final co empate e case buscando o segundo. Voume moi orgulloso do equipo e de #ANOSAFORZA, outra lección da nosa afección. É un espectáculo como animaron, como estiveron cos mozos".
Pensa que o resultado "fai xustiza aos méritos do equipo, ao traballo dos xogadores. Xogar aquí con 10 desde o minuto 10 é dunha dificultade enorme. E que ademais se che adianten con ese gol, calquera outro equipo baixa os brazos, réndese, acude ás queixas, ás escusas. E este equipo demostrou o orgullo que ten, a personalidade. Estou moi convencido de que estamos no camiño a pesar de que os resultados até agora non nos estean dando a razón".
