Rosalía Muíño González, máis coñecida como Lía (A Coruña, 13 de febreiro de 2000) regresa por terceira vez ao Dépor ABANCA para incorporarse ao cadro de cara á temporada 2023-24, na que será a súa cuarta etapa como branquiazul.
Lía, que actúa como centrocampista ofensiva, formou parte do cadro inicial en 2016 e das 3 primeiras temporadas de existencia do Dépor ABANCA, regresou ao comezo da campaña 2020-21 durante a pandemia de COVID-19 e, após abandonar de novo o equipo en xaneiro de 2021, volveu en maio para disputar as últimas xornadas da campaña 2020-21 en Primera Iberdrola.
Formada na canteira do Victoria CF, disputou o primeiro encontro oficial da historia do Dépor ABANCA, o 4 de setembro de 2016 en Ponte dos Brozos (Arteixo) fronte ao Oviedo Moderno CF, e formou parte do histórico ascenso a Primera Iberdrola ante o CD Femarguín, o 19 de maio de 2019 na localidade grancanaria de Arguineguín.
Con 87 partidos oficiais, Lía é as sexta xogadora no ranking histórico de aparicións co Dépor ABANCA, só superada por Cris Martínez (177), Gaby (117), Iris (107), Peke (106) e Teresa Abelleira (92). A centrocampista herculina xogou 15 encontros en Primera Iberdrola, 68 na Segunda División Nacional e 4 no playoff de ascenso a Primera Iberdrola, nos que marcou 13 tantos, todos na categoría de prata.
Entre as súas distintas etapas branquiazuis, Lía defendeu a camiseta do equipo da University South Florida Bulls, a universidade estadounidense onde cursa os seus estudos superiores.
Lía súmase ao cadro deportivista 2023-24 tralas renovacións de Lucía Alba, Henar Muiña e Cris Martínez durante o curso 2022-23, as recentes ampliacións de Millene, Raquel García, Charle, Samara, Carlota Sánchez, Eva Dios, Yohana e Monteagudo, as xogadoras con contrato en vigor: Inés Altamira, Paula Gutiérrez e Ainhoa Marín, e as fichaxes de Clara Rodríguez (FC Barcelona B), Laurina (Real Betis Féminas), Sara Debén (Fundación Albacete Femenino), Ayaka Noguchi (CP Cacereño Femenino) e Ana de Teresa (Levante UD).
