Após meses de espera, a cidade de Tarragona e o Nou Estadi serviron de anfitrións para o arranque dunha nova temporada de LaLiga Genuine, organizada pola Fundación LaLiga. A sexta edición da competición comezou esta fin de semana coa disputa dos seus primeiros 69 partidos.
A Fase 1, que estivo marcada pola deportividade, a tolerancia e o xogo limpo, arrincou a mañá do venres coa visita a Port Aventura. Esa mesma tarde tivo lugar o clásico desfile inaugural, onde todos os conxuntos deron unha volta de honra ao Nou Estadi ondeando a bandeira coas cores do seu club mentres pola megafonía do estadio escoitábanse os seus himnos. O agarimo das afeccións desprazadas e do público tarraconense facíase notar, recibindo a todos os equipos con aclamacións e aplausos da bancada.
Xa na mañá do sábado, o esférico comezou a rodar. A acción para o Dépor empezou ás 11:00h, no encontro que disputaron os branquiazuis ante o CF Fuenlabrada. O resultado ao finalizar as catro partes foi de 1-2 favorable ao CF Fuenlabrada. Esa mesma tarde, o Dépor xogou o seu segundo encontro ante a SD Eibar. Os branquiazuis fixéronse coas 3 primeiras metades do choque, polo que o marcador foi de 3-1 a favor do Dépor.
O domingo ás 10:00h chegaría o terceiro e último encontro para os coruñeses. O partido que enfrontou ao Dépor e ao FC Cartagena finalizou cun resultado de 0-3, polo que os cartagineses fixéronse coa vitoria. A xornada dominical finalizou coa entrega de medallas, onde todos os participantes dos 46 equipos levaron un recordo deses tres días, que estiveron cargados de fútbol, valores e deportividade.
O Dépor Genuine quedou situado na 19ª posición do grupo Superación, con 4 partes gañadas e 115 Puntos Fairplay. A seguinte cita de LaLiga Genuine para #OsNososGenuine será en marzo. A nosa Cidade Deportiva de Abegondo será a encargada de acoller a competición entre o 15 e o 17 de marzo, polo que a tolerancia, o espirítu de superación e o resto de valores que transmite LaLiga Genuine trasladaranse a A Coruña.
O equipo conta co apoio de Duacode, Vales & Asociados e o Hospital Quirón Salud.
