Coincidindo coas vacacións de Nadal no calendario escolar volven, un ano máis, os DéporCampus Cabreiroá en Sada, Alvedro, Club do Mar de San Amaro e Pontedeume. Levarán a cabo diferentes actividades lúdicas todas elas relacionadas co fútbol baixo a supervisión dos adestradores da canteira do RC Deportivo.
A sede de Alvedro, que se desenvolve a cuberto no campo de fútbol indoor das instalacións de PadelPlus, continuará coa súa duración de dúas semanas e levará a cabo a primeira os días 23, 26 e 27 de decembro; e a segunda os días 30 de decembro, 2 e 3 de xaneiro.
En Sada desenvolverase novamente nas instalacións do campo de fútbol municipal das Mariñas, en colaboración co Sada CF. As datas deste DéporCampus Cabreiroá de Nadal serán os días 23, 26 e 27 de decembro.
As outras dúas sedes terán lugar os días 30 de decembro, e 2 e 3 de xaneiro. A do Club do Mar desenvolverase baixo teito no polideportivo da sociedade de San Amaro e a de Pontedeume terá como escenario o campo da Gándara.
Nesta actividade da Fundación RC Deportivo poderán participar todos os nenos e nenas desde os 6 aos 14 anos en horario de 10:00 a 14:00 horas. Todos os participantes recibirán un equipamento oficial dos DéporCampus Cabreiroá, ademais dos diferentes sorteos de agasallos, actividades sorpresa...
As inscricións xa se atopan abertas na web oficial deporcampus.rcdeportivo.es.
Para calquera dúbida ou consulta coa inscrición poden contactar directamente coa organización na dirección de correo electrónico deporcampus@rcdeportivo.es.
Debido á limitación de prazas e a demanda para estas actividades de nadal, recoméndase non demorar a inscrición a todos aqueles nenos e nenas que queiran participar nestas xornadas apaixonantes de fútbol con diversas actividades, novas amizades e moito deportivismo.