Raquel García explicou esta mañá na sala de prensa de Abegondo que "desde que cheguei aquí sentinme unha auténtica privilexiada porque o Deportivo ABANCA ofrécenos todas as posibilidades e as capacidades para que podamos sentirnos futbolistas profesionais. Esa confianza que me transmitiron desde o primeiro momento faime que poida ser eu xogando dentro do campo".
Asegurou que a súa renovación até xuño de 2026 foi "un proceso moi sinxelo. Cando o club e a xogadora teñen as mesmas ideas e van no mesmo camiño é todo moito máis fácil. Un par de reunións nas que nos puxemos de acordo en diferentes puntos e é moi fácil cando ambas as partes queren continuar".
Ao mesmo tempo subliña que coa súa continuidade, unida a outras xa confirmadas como Cris Martínez, Samara ou Yohana, "o bloque segue xunto. Levamos xa varios anos xogando xuntas e dentro do campo nótase. Tamén é importante que o bloque se siga mantendo xunto. Coñecémonos e sabemos como xoga a de á beira. Estou contenta porque ao final segue xente importante".
A central deportivista admite que volver á liga F "custounos. Levamos 3 anos na pelexa na que practicamente en todos quedámonos ás portas dese ascenso que tanto queriamos. Este ano tiñamos claro que tiña que ser, foi e a verdade que volver á liga F e que o Deportivo ABANCA volva estar no máximo é un orgullo enorme".
Asume, iso si, que "é difícil chegar, pero moito máis difícil manterse. O bo é que somos conscientes diso, sabemos que temos que dar outro paso máis cara a adiante, que temos que seguir traballando igual ou máis e estamos mentalizadas diso. Vai ser moi complicado, pero temos a capacidade de poder estar aí. O traballo non vai faltar e con traballo pódense conseguir as cousas".
