O Deportivo visita mañá domingo 23 de outubro ás 18:00 horas no estadio Alfredo Di Stéfano ao Real Madrid Castilla, en choque correspondente á 9ª xornada no grupo 1º de Primera Federación (InSports.tv e Real Madrid TV).
Óscar Cano recupera para este partido a Trilli e Isi Gómez, coa alta médica despois de superar as súas respectivas lesións musculares: "Non teñen o mesmo ritmo que teñen os demais porque cada vez que se para custa renovar pero fixeron toda a semana co resto do grupo. Os habemos ir introducindo aos poucos na dinámica de adestramentos de todos e hoxe (por onte) xa estiveron co grupo durante toda a sesión", indicou o adestrador branquiazul respecto diso na rolda de prensa de onte venres.
Tamén entra na citación de 20 futbolistas Víctor Narro, que non estivo dispoñible no choque ante o Linares da pasada fin de semana en ABANCA-RIAZOR por unha fractura dos ósos propios do nariz. O adestrador branquiazul explicou aos medios de comunicación que o atacante balear "realizou a semana completa con precaución, coa máscara para protexer a zona danada".
Así pois, unicamente pérdense o encontro por lesión Jaime e Borja Granero.
Esta mañá, na última sesión en Abegondo previa ao encontro, houbo sesión de vídeo en primeiro lugar, un quecemento con xogos e rondos, unha tarefa de finalizacións, un partido táctico co plan de xogo e accións a balón parado para concluír.
Carlos Rodríguez, do Xuvenil A, foi o representante de #ANOSACANTEIRA na sesión.
Os Nosos chegan ao choque na 5ª praza do grupo con 15 puntos mentres que o Real Madrid Castilla, no que milita o ex deportivista Noel, é 8º con 12 após empatar a pasada fin de semana en Mérida (1-1).
No seu campo do Alfredo Di Stéfano de Valdebebas nesta temporada, o filial merengue impúxose ao CD Badajoz (3-1) e Unionistas de Salamanca CF (1-0); e empatou co Córdoba CF (1-1) e Balompédica Linense (2-2). Así pois, os brancos non coñecen aínda a derrota.
Carlos Dotor, centrocampista madrileño, apuntou nos medios de comunicación oficiais do Real Madrid que "vimos de dous empates consecutivos e temos ganas de facelo bo cunha vitoria en casa e nun partidazo como é o do Dépor".
Vaticina un partido "de ti a ti. Temos que tentar quitarlles o balón, sometelos, que non o pasen ben e aí vai estar a clave. Se facemos o que di o míster e non nos saímos do guión, non haberá ningún tipo de problema para gañar".
Esta pasada pretemporada, concretamente o pasado 6 de agosto, ambos os equipos víronse as caras no campo de Cantarrana de Viveiro con motivo do Memorial Luis de Carlos. Ao final do tempo regulamentario chegouse con empate sen goles (0-0) após un primeiro tempo no que os branquiazuis foron netamente superiores. Na quenda de penaltis levou o premio o filial madridista: 5-6.
O Dépor viaxa mañá mesmo á primeira hora da mañá en voo que despega á primeira hora do Aeroporto da Coruña e regresará tralo encontro, tamén en avión.
Óscar Cano manifestou que "o Club fai un gran esforzo e mira por nós. Polo horario do partido e por este tipo de circunstancias, o Club, chapó. Quere que viaxemos nas mellores condicións, no menor tempo posible, que nos dea tempo a chegar, comer, descansar e estar moi enfocados ao que é o partido".
O luns 24 haberá xornada de descanso. O equipo adestrarase de novo en Abegondo o martes 25 de outubro ás 10:30 horas.
