A selección española feminina, vixente campioa do mundo, regresou a ABANCA-RIAZOR hoxe martes 16 de xullo para medirse a Bélxica en partido clasificatorio para a Eurocopa de 2025, correspondente á 6ª e última xornada.
Foi o último choque do combinado nacional antes dos Xogos Olímpicos de París e serviu ademais para homenaxear ao tres xogadoras que superaron os cen partidos vestindo a camiseta da selección: Alexia Putellas (118), Jenni Hermoso (116) e Irene Paredes (107).
ABANCA-RIAZOR non defraudou e un total de 16.650 persoas envorcáronse coa selección española, que derrotou a Bélxica (2-0) ademais cun golazo case desde o medio do campo da ex deportivista Teresa Abelleira.
O 4 de outubro de 2019, España recibiu na Coruña a Azerbaiyán no primeiro partido da fase clasificatoria para o torneo continental de 2021. Foi o debut histórico da selección española feminina no Estadio coruñés, con marca de espectadores (máis de 10.000), xusto no mes no que se celebrou o 75 aniversario da súa inauguración.
Esta temporada recentemente concluída (2023-24), o Deportivo ABANCA, camiño da liga F, disputou un total de 3 partidos de liga en ABANCA-RIAZOR, ante o Deportivo Alavés, CE Europa e Cacereño Femenino, partido este que supuxo o ascenso das Nosas á máxima categoría do fútbol feminino español.
Intercambio de obsequios
O Deportivo, representado pola Vicepresidenta Michelle Clemente, e a RFEF, polo Vicepresidente Rafael do Amo, protagonizaron un intercambio de obsequios no palco de ABANCA-RIAZOR.
As relacións entre ambas as entidades son de total colaboración, o que se viu reflectido esta tarde en ABANCA-RIAZOR cunha organización perfecta.
