Borja Jiménez manifestou na sala de prensa de Abegondo que "está claro que non lle gusta perder a ninguén, pero non me deixo levar moito polas sensacións do resultado, senón polo que a análise fría do partido ou dos partidos dime. Entón estou bastante tranquilo sabendo que hai cousas que mellorar e partindo da base de que estamos niso e que hai que mirar a clasificación para ser máis positivos".
Asegura que este domingo 20 de febreiro ante o CD Calahorra (17:00 horas, Footters) "a idea vai ser a mesma. Desde o último día que saímos con moitísimo futbolista ofensivo hai xente que pode pensar que se xogas con menos xogadores ofensivos tes menos risco de perder. Está claro que se xogamos con catro centrais, tres mediocentros defensivos limitas as accións ofensivas do rival pero as nosas tamén diminuirían. A idea non vai cambiar porque nos permitiu ser líderes moitas semanas. Permítennos estar aí arriba os sistemas ou os xogadores que utilicemos: dous puntas máis específicos, tres puntas máis específicos, ou dúas mediapuntiñas ou un... Non vai cambiar a idea de ser ofensivos, de querer atacar, de dominar, sabendo que con todo iso exposche a que o equipo rival poida sacar transicións".
Destaca que esa idea "vai ser a mesma porque é a dos equipos que queren conseguir obxectivos. Eu se por algo quero que se caracterice o meu equipo é porque sexa ofensivo desde o inicio. Ofensivo para querer gañar os partidos, que teñamos as armas para gañar. Nós como Club, como gran entidade, debemos de ser moi agresivos en canto a querer gañar os partidos, sabendo que iso ten os seus riscos, como todos os equipos que son dominadores. É a idea de xogo e para o que está construído este cadro. Crerme que a outra cousa é complicado que poida xogar".
A pesar de que o domingo se pecha un maratón de partidos que arrancou o domingo 13 en Logroño ante a SD Logroñés e continuou o pasado mércores en ABANCA-RIAZOR ante o Real Racing Club, o adestrador branquiazul apunta que ante o CD Calahorra "non poden ser os mesmos porque Elitim está sancionado, pero poderían ser os mesmos. Imos tentar sacar aos mellores para ese partido, independentemente de que xogasen o mércores ou non. Non son nin fun partidario de rotacións, nin de reservar xente antes dos partidos. Se os xogadores chegan en perfecto estado, tentaremos poñer aos mellores para ese partido, que non quere dicir isto que non vaia a haber catro, cinco, seis ou ningún cambio. Imos tentar acertar co perfil de xogadores que o partido nos vai a demandar".
Sobre o rival, o CD Calahorra, Borja Jiménez subliña que "vén en dinámica positiva. Dos últimos seis ou sete paréceme que só perdeu un. Foi co Racing de Ferrol, se non recordo mal. Na ida tivemos a raíz do 0-1 un partido un pouquiño máis plácido, pero é un equipo que con pelota fai cousas interesantes, acumula xogadores dentro, a nivel defensivo ten un moi bo porteiro que xa o tiven eu en Valladolid. Vai ser un partido, soa a tópico, pero é que todos os da categoría son difíciles. Ademais, agora na dinámica que levamos nós, está claro que arrancar vainos a custar quizá un pouco máis do habitual, porque cando non ganas é humano e podes chegar a ter algunha dúbida que antes non tiñas: en canto ao aspecto de dar un pase ben, un pase mal... Pero é que iso é o normal. Entón vai ser un partido que nos vai a custar sacar adiante, pero ímolo a conseguir".
Non cre que o triunfo este domingo sexa máis transcendental porque para o Dépor "é sempre importante gañar, porque aquí existe esa necesidade de gañar cada vez que se compita. Os clubs grandes e máis nesta categoría cada semana que non gañes parece que todo está mal. Esa necesidade témola porque vimos de tres partidos de non conseguilo, pero non creo que vaia a ser un partido transcendental. Temos que gañar porque vimos de perder e non nos gusta perder; e hai que gañar porque non estamos en boa dinámica, pero é que a semana que vén, se gañamos o domingo, iremos xogar fóra e volveremos querer gañar; e se non gañamos abrirase un debate e cada vez que non gañemos iso vai existir. Pero existiu así desde o principio de temporada, o que pasa que como gañamos tanto, esquecérallenos o que era perder nun club destes. Non pasa nada, ter paciencia e gañar. O obxectivo é maio e a data de hoxe estamos bastante ben situados".
Considera que "non é algo novo que un equipo despois de perder ao día seguinte teña dúbidas. É o normal que os xogadores teñan dúbidas despois dunha derrota, porque lles pasa aos xogadores, a todo o mundo coa análise rápida".
Explica que iso se traballa "ensinándolles que cousas podiamos facer antes mellor que agora; demostrándolles, non dicíndollo, senón demostrándollo con imaxes todo o que estamos a facer ben e onde agora non estamos a facer as cousas tan ben. É ensinarlles aos xogadores as cousas que hai que mellorar e cal é o camiño".
Borja Jiménez subliña que "a data de hoxe son os líderes do grupo e iso significa que fixeron nestas vintetantas xornadas que levamos as cousas os que mellor. Non sabemos como será en maio, pero de momento estes xogadores son os que mellor fixeron as cousas en todo este tempo. Entón a súa confianza ten que ser moi alta, independentemente de que nestes tres últimas semanas non gañásemos".
Iso si, resalta que "perder ten poucas cousas boas, por non dicir ningunha. Está claro que o perder achégache máis á realidade do que era a categoría. Cando levas tantísimas semanas sen perder, tantísimas semanas seguidas gañando pois pos a capa de Superman e dis 'hostia, non imos perder nunca'. O perder achégache máis á realidade, pero iso non quere dicir que sexa un aspecto positivo. Onte escoitaba o Real Madrid de baloncesto, que é líder en Euroliga, líder en ACB, cústalle gañar onte en Copa, pero viña de perder dous partidos en ACB que me parece que nos últimos corenta e tantos partidos só perdera tres e perdeu dous seguidos. Todo o mundo cústalle. Chega un momento que eses equipos que están predestinados para ser campións, pasan momentos malos que o único que fai é que a xente volva abrir as orellas, que todo o mundo saiba que vai ser moi difícil. Está a xente que se sorprende porque pensaba que iamos gañar todo e a estar ascendidos a finais de marzo e está a xente que sabiamos que ía ser así. Darlle normalidade".
