Deportivo e Orzán presentan o novo equipo feminino branquiazul, que arrincará a próxima tempada

Entre as razóns para dar este paso, Tino Fernández indicou que "o sentir xeral do mundo do fútbol é que haxa unha aposta maior polo fútbol feminino. Non hai ningunha imposición de que o fútbol profesional incorpore ao feminino como de feito algúns clubs importantes téñeno neste momento. O mundo do fútbol, da man da Real Federación Española, impulsou o fútbol feminino no que tamén se cultivaron importantes éxitos. A liga súmase a este impulso e empúxanos a que se o vemos viable en cada un dos clubs iniciemos este camiño".

O dirixente branquiazul engadiu máis motivos: "damos este paso polo antecedente histórico brillante que temos no Deportivo, polo noso propio compromiso, polo maior apoio que demostra o fútbol de que o feminino estea presente dentro dos clubs de fútbol profesional".

Tino Fernández quixo expresar "o meu agradecemento a todos aqueles que nos axudaron, orientado, aconsellado, animado, empezando pola propia Federación, de maneira particular pola Federación Galega de Fútbol, continuando pola AFAC, á que quixemos facer partícipe e comunicar cal era nosa intención, de que era un proxecto de cooperación. De maneira singular aos dous clubs máis importantes dentro do fútbol feminino da cidade, como son a Vitoria e o Orzán. Tamén o falamos nas institucións políticas, na Xunta, Deputación e Concello. Percibimos ilusión, ánimo, impulso".

Cre que "vincular o Deportivo ao fútbol feminino ten que xerar ilusión. Estou seguro que a partir deste paso, o fútbol feminino terá maior tirón, maior impulso. Vaise a traducir en máis xogadoras, máis licenzas e máis equipos".

Indica que o Orzán, e Juan Eiras e o seu equipo, "achegaranos apoio no institucional, no técnico, na captación de xogadoras. Imos percorrer xuntos un camiño que desde o punto de vista formal esténdese durante o próximos tres anos".

Tino Fernández tamén deixou claro o ambicioso do proxecto: "Saímos en Segunda Nacional pero a idea é que o Deportivo poida estar no futuro en Primeira División Nacional. Terá a súa dificultade, porque son sete grupos e despois hai un play off. É un proxecto que non vén competir con ninguén, senón que vén ocupar un espazo agora mesmo non ocupado".

O presidente do Deportivo acabou a súa intervención manifestando que "cando vexamos ás nosas mozas xogar, ao noso equipo xogar, que o impulsemos de verdade. Para que os proxectos non sexan unha moda, fan falta recursos e apoio, tamén emocional. Igual que apoiamos aos mozos apoiemos tamén ás mozas".

Pola súa banda, Juan Eiras lembrou que o "dez anos que levamos traballando co fútbol feminino levarámonos/levarámosnos unha sorpresa tremenda, polo funcionamento das mozas, polo Club, por como se involucraban. Conseguiuse mesmo o que perdera o fútbol modesto, que houbese rivalidade. Meter mil persoas nun campo é imposible hoxe en día. E iso producíase coas mozas".

Expresou a súa satisfacción pola chamada do Deportivo, porque "o único que pode ascender un equipo a Primeira División é o Deportivo".

Subliñou Eiras que "para as mozas vai ser unha ilusión tremenda competir cos medios que ten o Deportivo, coa ilusión que ten o Deportivo. Vai ser unha guía tremenda para o fútbol feminino".

Tino Fernández pide "encher Riazor este fin de semana"

En canto a outros temas de actualidade, e a preguntas dos medios de comunicación, Tino Fernández confesou "non estar preocupado (polo refacho do equipo de partidos sen gañar). Estou con ganas de gañar, que é o que quere o equipo, o corpo técnico e toda a afección. É o que temos que facer. Estar relativamente confiados e animados. Temos capacidade para facelo, como o demostramos durante unha gran parte da tempada".

Pide ante o Levante, un rival directo, "saír a apertar os dentes, a apertar moitísimo, moi concentrados. Estar ao 150 por cento no campo e na bancada tamén, que eu creo que esa parte non vai fallar, porque non falla nunca".

Sobre a situación contractual de Lux e de Celso Borges, o Presidente aclarou que "todo está igual" que o pasado xoves, día no que o Director Deportivo do Club, Richard Barral, deu unha rolda de prensa en Abegondo. "Só me permito un matiz, no caso de Lux, que si hai unha evolución. O acordo fíxose, está pendente de firma. O seu representante está no estranxeiro, non está en España. É un tema de papeis. O acordo está pechado".

Así mesmo, expresou o seu desexo de "distraernos o menos posible" con estes temas: "Estamos nun momento de equipo, competición, partido do Levante, partido de Balaídos. O importante é encher Riazor este fin de semana. Estar moi concentrados os do campo, moi animosos os da bancada e conseguir o obxectivo de meterlle a un rival directo a 12 puntos máis o golaverage. Sería deixalo nunha situación que sería xa moi difícil que nos pille".