O porteiro deportivista Francis Uzoho foi operado hoxe xoves 14 de novembro no Hospital HM Modelo da Coruña de maneira satisfactoria.
O traumatólogo do Club, Rafael Arriaza, procedeu á reparación do seu xeonllo esquerdo lesionado o pasado mes de outubro no partido amigable que a súa selección, Nixeria, disputou ante Brasil. O meta internacional branquiazul quedará ingresado durante as próximas horas no centro médico coruñés.
Francis, que está cedido esta temporada ao Omonoia FC de Chipre, chegou á Coruña a mediados da pasada semana para realizar o preoperatorio, ser intervido cirurxicamente e iniciar a partir de agora o seu proceso de recuperación.
