Sergio Gontán Gallardo (Brunete, Madrid, 27 de decembro de 1991), máis coñecido como Keko, converteuse en novo xogador do RC Deportivo para o que resta de temporada e dúas campañas máis.
Keko, extremo formado na canteira do Atlético de Madrid, chegou a debutar co primeiro equipo colchoneiro na Temporada 2008-2009. Posteriormente foi cedido ao Real Valladolid (Primeira División), FC Cartagena e Girona FC (ambos en Segunda), antes de ser traspasado ao Catania, co que xogou 3 campañas na Serie A italiana, cunha curta cesión ao Grossetto, da Serie B, entre medias.
Tralo descenso do equipo siciliano en 2014, regresou a España para asinar co Albacete, no que se destapou con 36 partidos e 6 goles, o que lle valeu o regreso á máxima categoría, pois a SD Eibar fíxose cos seus servizos no verán de 2015. No club de Ipurua disputou 32 encontros e marcou 3 tantos, antes de asinar co Málaga CF, co que xogou 43 partidos en 2 campañas máis en Primeira División.
Tralo descenso do cadro andaluz, o pasado exercicio foi cedido ao Valladolid, recentemente ascendido á máxima categoría. Co cadro blanquivioleta xogou 29 partidos, nos que anotou 2 goles, antes de regresar a La Rosaleda, onde cumpriu a primeira metade da presente temporada.
Durante a súa formación, Keko acumulou 28 internacionalidades e 9 goles coas seleccións españolas sub-16, sub-17, sub-18 e sub-19. Ademais, coa sub-17 proclamouse campión de Europa en 2008, sendo un dos goleadores na final ante Francia (4-0), nun equipo no que formaban xogadores como Thiago Alcântara, Oriol Romeu, Martín Montoya ou Sergio Canales.
