Juan Carlos Menudo pasouse esta mañá pola sala de prensa de Abegondo, minutos antes de arrancar a sesión diaria de traballo do Deportivo.
O centrocampista branquiazul admite que "despois dunha xeira de tres partidos (sen gañar), cortala cunha vitoria era o principal, o máis importante. Despois desta vitoria, o equipo se reconforta e volve traballar con esa tranquilidade entre comiñas que viñamos facéndoo. Os resultados fanche meter ese nerviosismo no corpo, pero a mellor solución para iso era gañar os tres puntos, sacar o partido de CD Calahorra e contentos por iso".
Preguntado pola situación na táboa, o futbolista andaluz opina que "dentro do vestiario déuselle a normalidade que isto leva. A diferenza de puntos era moi grande porque as cousas as estabamos facendo ben, pero nunha Liga regular había moita diferenza de puntos e non era normal. Sabiamos que ía chegar unha mala serie, que todo non podía ser sacar de tres en tres. Somos persoas. Para iso estaba o colchón de puntos, para cando esta situación chegase a ser, ter esa vantaxe. Agora mesmo non hai vantaxe ningunha, todo empeza de novo. Hai catorce partidos, catorce finais que van ser un ti a ti. Nin gañando o partido do Racing deuse un golpe nin se ascendeu. Sumáronse tres puntos máis. E aínda perdendo tampouco pasa nada. Seguimos cunha vantaxe arriba. Está todo por decidir como fai dúas ou tres semanas. O equipo lévao con normalidade. Había algo de preocupación por esa xeira de tres partidos que si é verdade que afecta un pouco a confianza, pero unha vez rota esa xeira, o equipo vai volver ser o que foi, o que xera ocasións, o que chama á porta para tirar os partidos. Nese aspecto estamos tranquilos".
Este domingo 27 de febreiro no Estadio Nuevo Matapiñonera de San Sebastián de los Reyes (12:00 horas, Footters), vaticina "un partido complicado nun campo que non estamos afeitos; pero este equipo nunca puxo escusas niso. Haberá que adaptarse rápido e ser nós mesmos, porque sendo nós estaremos sempre máis preto de sacar a vitoria".
A nivel persoal, cualifica a temporada de "complicada porque non viña para ter esta participación, pero de todo apréndese, de todo hai que sacar o lado positivo. Estou a me adaptar porque o que eu quero é axudar ao equipo e niso vou estar. Vou estar sempre ao pé do canón traballando e cando me toque, tentar achegar, porque para iso vin".
Confesa que non falou respecto diso con Borja Jiménez: "Non son dos dos que buscan explicacións cando xogo e tampouco me gusta facelo cando non o fago. El ten unha idea, é o que toma as decisións e nós acatámolas e temos que seguir traballando. Por ningunha das dúas partes imaxinouse esta situación pero isto é fútbol. Hai que seguir e ninguén me vai a quitar a ilusión de seguir traballando e de tentar axudar aos meus compañeiros e tentar chegar ao obxectivo, que está moi claro desde primeira hora que o ano que vén podamos estar nunha nova categoría".
No pasado mercado de inverno, recoñece que houbo "momentos nos que cada un pelexa e tenta o mellor para cada parte. Eu tiña claro de onde viña, que quería ser. É verdade que houbo situacións que non se poden negar, non entraba e ese mes foi complicado para min e para a miña familia. Pero cando un ten a idea clara que é quedar, estar onde quere estar... Eu tiña claro que a miña situación era estar aquí, que era moi complicada a saída, mellorar algo onde estou. A mellor solución para min era quedarme aquí e axudar ao equipo. Estou onde quero estar e estamos no camiño, onde o asinamos todos ao principio de temporada, que é pelexando o primeiro posto".
Conta que se apoiou "na miña familia, que son os que me aguantan e os que me escoitan. Tanto para a miña familia aquí na Coruña como en Sevilla, está a ser unha temporada moi complicada. Pero tamén estou contento, os meus compañeiros son como persoa incribles porque me apoiaron en todo momento, déronme agarimo e iso cando tes unha situación así é o que che fai falta. Estou feliz, estou contento, teño contrato e quero seguir aquí facendo cousas importantes, que é ao que apostei no verán tendo outras ofertas. Quixen estar aquí porque quero e porque o Dépor é o mellor equipo para estar agora mesmo".
Subliña que "me dedico a traballar e tentar falar no campo. Ninguén me pode achacar que non o fixen, que baixase os brazos. Esta situación non a vivín nunca, pero se teño que sacar algo positivo é que me fixo máis forte. Sigo traballando para dez minutos, para quince, para unha primeira parte ou para o partido completo".
Con máis participación agora no equipo, Juan Carlos Menudo opina que "as cousas cambian. Naquel momento foi unha situación complicada. Tentouse forzar algo que non había. Chegamos a un acordo todos e o mellor era seguir e estar todos unidos porque non había outra solución. Non había ningunha situación que me puidese sacar de aquí".
Por este motivo, asegura que non ten "ningunha dúbida de que volvería elixir sempre o Deportivo, porque me apetecía, porque quería, porque era o mellor equipo, porque é o mellor equipo e porque retirarme do fútbol sen xogar un partido en ABANCA-RIAZOR como local calquera futbolista non debería de facelo. Teño a fortuna de xogar en ABANCA-RIAZOR, de xogar con #ANOSAFORZA e contarlle aos meus fillos que fun futbolista do Dépor".
