Mujaid incorporouse esta mañá aos adestramentos co Deportivo despois de gardar a regulamentaria corentena establecida polas autoridades sanitarias para as persoas que fosen contacto cun positivo de COVID-19 e ademais dar negativo na proba PCR.
Así pois, unicamente Celso Borges, Héctor e Derik Osede adéstranse á marxe dos seus compañeiros, ben no ximnasio ou no céspede co readaptador, Fran Molano.
Hoxe cos fabrilistas Adri Castro e Alberto, Rubén de la Barrera incrementou a intensidade e a carga física con rondos de presión, un exercicio de posesión, unha tarefa defensiva e fútbol en espazo reducido para concluír.
Mañá xoves 25 de marzo, o Dépor cambia Abegondo por ABANCA-RIAZOR para unha sesión a porta pechada que arrancará ás 10:30 horas.
