Após o tropezón de Cáceres, Irene Ferreras apostou pola continuidade do bloque, coa única rotación na portería e o regreso de Charle ao once inicial en lugar de Eva Dios.
O partido comezou tremendamente igualado, con algo máis de posesión para o Dépor ABANCA pero sen fluidez por ningún dos bandos na zona de perigo. Case media hora tardou en chegar a primeira ocasión do partido nunha xogada persoal de Ainhoa Marín que conduciu até a frontal para levantar a cabeza e tratar de bater con calidade a Maitane. O seu disparo marchouse fóra, preto do recanto da portería osasunista. Camiño do 35 unha boa xogada combinativa en zona de ataque habilitou a Samara para o cara a cara coa gardameta visitante, pero a súa vaselina pousouse sobre a rede da meta rojilla.
A primeira intervención de Maitane chegou após un recorte na frontal de Millene que puido disparar raso pero demasiado centrado para que a gardameta puidese blocar abaixo sen demasiadas dificultades. Aínda que a máis clara tívoa case chegando ao descanso Laura Fernández que non rematou ben un centro raso desde o lateral de Ainhoa Marín que puido cambiar o sino do partido xusto antes do intermedio. Algo que finalmente sucedeu grazas á insistencia de Marta Charle que, após recibir dunha combativa Henar, puido encarar a portería visitante e disparar axustado para pór, sobre a bucina, o xusto 1-0 no marcador.
Se ben que acabou a primeira metade, mellor non puido comezar a segunda. Ao tres minutos un bo pase entre liñas de Millene aproveitouno Laura Fernández para anotar con clase ante a saída de Maitane e dar máis tranquilidade se cabe nun partido igualado pero controlado polas Nosas. Ainhoa Marín puido facer o terceiro grazas á súa velocidade, deixando atrás ao seu par, gañando liña de fondo e rematando para obrigar a Maitane a meter unha man salvadora. O golazo da mañá estivo a piques de chegar xusto á hora de partido cun recorte na frontal de Millene que acomodouna para pegarlle con dureza. Entre a man da porteira e o traveseiro evitaron o tanto da brasileira.
Xa se superara con fartura a hora de xogo cando Lucía tivo que facer a súa primeira intervención de consideración a disparo directo de falta de Patricia Zugasti. En área contraria tamén o tentou, con idéntico resultado, Cris Martínez disparando raso desde a frontal.
Non se conformaba o Dépor ABANCA co 2-0 e tentouno até o final, con ocasións como a que tivo Inés Altamira que abortou no último instante a zaga visitante cando a bancada estaba a piques de celebrar o terceiro tanto e a terceira vitoria en casa das branquiazuis. Tampouco puido anotar Carlota Suárez ao rematar lixeiramente cruzado o man a man ante Maitane. Parecía que o mesmo ía suceder coa ocasión final de Eva Dios pero o seu rexeite caeu aos pés de Sara Navarro que si puido anotar o tanto co que se puxo punto final ao partido no que o Dépor ABANCA recuperou o pulso á liga en vésperas da Copa.
Dépor ABANCA: Lucía, Cris Martínez (Patri López, min. 86), Inés Altamira, Raquel García, Samara, Paula Gutiérrez, Henar, Ainhoa Marín, Laura Fernández (Eva Dios, min. 68), Charle (Carlota Suárez, min. 78) e Millene (Sara Navarro, min. 78).
CDF Osasuna: Maitane, Saioa (Miriam Rivas, min. 80), Vera (Merche Izal, min. 63), Josune, Celia, María González (Patricia Zugasti, min. 46), Aitana, Iara (Alexia Jr., min. 63), Leyre (Valero, min. 63), Carmen e Maitane Vilariño.
Goles: 1-0 Marta Charle (min. 45); 2-0 Laura Fernández (min. 48); 3-0 Sara Navarro (min. 90+3).
Árbitra: Couso Cuadrado (c. Catalán). Amoestou a Leyre (min. 6), Raquel García (min. 11), Josune (min. 85) e Henar (min. 90).
Incidencias: partido da 5ª xornada de Primeira Federación FutFem disputado na Cidade Deportiva de Abegondo ante uns 400 espectadores.
