O Dépor visita mañá domingo 29 de xaneiro ás 16:00 horas (InSports.tv) no Estadio Iberoamericano 2010 ao San Fernando CD Insular, en choque correspondente á 21ª xornada en Primera Federación.
Os resultados da pasada fin de semana deixaron a Os Nosos na 4ª posición da táboa con 38 puntos pero máis preto da cabeza: Real Madrid Castilla e Córdoba CF teñen 40 puntos; e o líder AD Alcorcón, 42 puntos.
O equipo branquiazul desprazouse en avión ás 11:50 de hoxe a Sevilla e adestrouse esta tarde por última vez antes do partido na Cidade Deportiva Bahía de Cádiz, sita na localidade gaditana de Puerto Real.
O corpo técnico branquiazul dispuxo para os 19 futbolistas convocados, após un quecemento con rondos, dun exercicio de finalizacións e fútbol en espazo reducido.
Após a chegada de Lucas o pasado 31 de decembro, o Dépor axustou o seu cadro coas chegadas de Lebedenko, Kike Saverio e onte venres de Pepe Sánchez, que hoxe se uniu ao grupo en Cádiz e participou con normalidade en toda a sesión de adestramento.
En rolda de prensa onte mesmo, Óscar Cano acepta o reto de xestionar este cadro: "Eu quero esta xestión e este reto. Pregúntaslle a calquera adestrador dos 40 que forman a Primera Federación e diranche que ao que máis envexan, non por min nin polo que son senón polo cadro que teño, é ao adestrador do Dépor. A todo o mundo gustaríalle estar aquí sentado (en alusión á cadeira da sala de prensa de Abegondo)".
Asegura que este cadro, con estes novos reforzos, "ábreme alternativas xigantescas".
O adestrador branquiazul presume ademais de "aí abaixo (no vestiario) é xente moi humilde. Pitan un penalti e Lucas dálle a pelota a Quiles porque sente Lucas que é Quiles o que tirou os penaltis até o momento e estivo ben. Ves a Lucas que está a chancear sempre coa xente máis nova. Temos un cadro a nivel humano espectacular. Aí abaixo hai un ambientazo. E é algo que recalcan moito os doutores, os fisioterapeutas, que pasan moito tempo con eles. A xente que convive con eles día a día está encantada de como é o grupo e para min é un agasallo porque faiche o día a día moito mellor".
Pola súa banda, o conxunto gaditano, no que militan os ex deportivistas Bicho e Luis Ruiz, transita pola zona perigosa. Ocupa a 17ª posición con 20 puntos a pesar do triunfo (0-1) da pasada fin de semana en Mérida.
Na primeira volta, en ABANCA-RIAZOR, o San Fernando CD Isleño, por aquel entón ao mando de Salva Ballesta, sorprendeu (0-1) a un Dépor que dirixía Borja Jiménez.
No seu campo do Estadio Iberoamericano 2010, os andaluces gañaron ao AD Ceuta (1-0), RB Linense (1-0) e CF Fuenlabrada (3-0); empataron coa UD San Sebastián de los Reyes (1-1) e Linares Deportivo (1-1); e caeron ante o Racing de Ferrol (0-1), AD Mérida (1-2), RC Celta B (1-2), Algeciras CF (0-2) e Córdoba CF (1-3).
Esta semana, o equipo que agora dirixe Pablo Alfaro acaba de incorporar ao pivote defensivo Alfonso Martín, procedente do Atlético Baleares. "Veño coa máxima ilusión a este Club, sei que é un Club que está a crecer e entre todos temos que ir sumando para que siga", comentou o futbolista xerezano na súa presentación.
Admite que "coa saída tiven que deixar de adestrar (no seu anterior Club) e estiven un pouco máis parado e quizais necesite algúns días máis de adaptación, pero atópome ben e estou dispoñible para o que o míster e o equipo necesiten".
Concluído o encontro en San Fernando, o Dépor trasládase por estrada a Málaga e pasará a noite no Hotel Eurostars Málaga. O regreso á Coruña, en avión, será o luns 30 á primeira hora da mañá para adestrar en Abegondo a partir das 13:00 horas.
