O Deportivo caeu ante o CD Mirandés en Anduva nun partido que se torceu nunha nefasta primeira parte e ao que non lle puido dar a volta nunha segunda marcada pola multitude de chegadas e a falta de remate. Esta derrota, unida aos demais resultados da xornada, devolven a zona de descenso ao Dépor, que non dependerá de si mesmo na última xornada para evitar o abismo.
Fernando Vázquez, preparador branquiazul, realizou cinco cambios con respecto ao once inicial que presentou no partido da pasada fin de semana fronte ao Extremadura UD. En defensa, Abdoulaye Ba e Salva Ruiz entraron por Montero e David Simón. Na medular, Peru Nolaskoain supliu a Borja Valle. En ataque, Hugo Vallejo substituíu a Aketxe e Christian Santos ocupou a posición de Sabin Merino.
O Dépor cedeu a iniciativa ao Mirandés desde o principio. Aínda así, a primeira chegada do partido foi por parte do conxunto branquiazul, nun disparo desde o bordo da área de Peru Nolaskoain que se perdeu por riba do traveseiro.
O cadro burgalés dominou a posesión holgadamente pero as súas primeiras ocasións chegaron a balón parado, en botas de Merquelanz. No minuto 12, o futbolista cedido pola Real Sociedad enviou alto un libre directo desde a frontal da área. Dez minutos despois, acertou a coar o balón na portería branquiazul cun maxistral toque por riba da barreira que se coou polo vértice superior dereito do marco defendido por Dani Giménez.
Preto da media hora de xogo, Dani Giménez evitou o segundo gol burgalés, nun canonazo de Guridi. O rexeite do porteiro deportivista caeu a pés de Joaquín, cuxo remate posterior atrapouno o gardameta.
O Dépor soamente chegou perigo en toda a primeira metade nun libre directo executado por Gaku. Raúl Lizoain respondeu con seguridade ao lanzamento do xaponés. Corría o minuto 36 de encontro.
Nos minutos finais dun primeiro período para o esquecemento, o Mirandés gozou de dúas claras oportunidades para ampliar a súa vantaxe. En primeiro lugar, Marcos André culminou un contragolpe cun disparo excesivamente alto, no minuto 43. Segundos despois, os burgaleses gozaron dunha tripla ocasión por medio de Álvaro Peña, cuxo tiro desviou Dani Giménez, e González, que primeiro se atopou coas pernas de Ba e despois disparou fóra.
Visto o panorama, Fernando Vázquez realizou 4 cambios de golpe ao regreso dos vestiarios. Peru Nolaskoain, Salva Ruiz, Christian Santos e Ba quedaron na caseta para deixar o seu sitio a Aketxe, Sabin Merino, Borja Valle e Keko. Con estas substitucións non se modificou o debuxo táctico, xa que Bóveda pasou a actuar como central e Hugo Vallejo e Mollejo atrasaron a súa posición aos carrís, pasando a xogar na liña de tres cuartos Aketxe e Keko.
O Dépor saíu en busca do empate e rapidamente percibiuse na súa actitude e o seu xogo. A pesar de todo, as ocasións claras brillaron pola súa ausencia. O máis reseñable sucedeu no minuto 53, cando unha boa combinación entre Gaku e Keko culminouna Aketxe cun remate chegando desde atrás a mans do porteiro local. Os branquiazuis chegaron en numerosas accións, sempre polos extremos, pero sen poñer a proba unha soa vez a Raúl Lizoain, posto que o equipo deportivista foi incapaz de rematar a porta nin un deses envíos desde os costados. Mesmo durante o tramo central do segundo tempo, o Mirandés empezou a estirarse e saír ao contragolpe, aínda que tampouco esixiu os esforzos de Dani Giménez.
Nos últimos 20 minutos de xogo si se sucederon as chegadas e oportunidades por parte do Deportivo. No minuto 70, Mollejo centrou raso pero Keko non foi capaz de rematar en primeira instancia. Quen si o fixo foi Sabin Merino, que enviou a pelota á dereita do marco local. No 79, un disparo lonxano de Aketxe envelenouse ao golpear en Sabin Merino e polo clásico bote anterior dos disparos do mediapunta vasco, pero Raúl Lizoain atrapou o coiro con seguridade.
De novo estivo providencial Raúl Lizoain ante Aketxe no minuto 83. Foi nun libre directo potentísimo ante o que o porteiro do cadro burgalés respondeu rexeitando de puños. Na acción posterior ao despexe, o colexiado anulou un tanto a Keko por fóra de xogo.
Keko de novo foi protagonista no minuto 86, ao rematar no segundo pau un córner peiteado por Sabin Merino. O disparo do extremo topouse co cruzamento de Guridi, quen desviou novamente a saque de esquina. O pequeno extremo gozou doutra ocasión xa en tempo engadido, un disparo cruzado que o gardameta local sacou a córner. Nese mesmo saque de esquina, Bóveda cabeceou frouxo. Nos instantes finais, Borja Valle recuperou unha pelota en campo contrario pero o seu disparo desde fóra da área marchouse ás nubes.
Con esta derrota, o Deportivo queda con 48 puntos unha xornada máis e os resultados noutros campos devólveno ás posicións de descenso cando só queda un partido para finalizar LaLiga SmartBank, o vindeiro luns ante o CF Fuenlabrada.
CD Mirandés: Raul Lizoain, González (Carlos Julio, min. 65), Odei, Sergio González, Franquesa, Malsa, Guridi, Joaquín (Ohemeng, min. 84), Álvaro Peña (Antonio Sánchez, min. 55), Merquelanz e Marcos André.
RC Deportivo: Dani Giménez, Bóveda, Ba (Aketxe, min. 46), Álex Bergantiños (Beauvue, min. 85), Mujaid, Salva Ruiz (Keko Gontán, min. 46), Peru Nolaskoain (Borja Valle, min. 46), Gaku Shibasaki, Hugo Vallejo, Christian Santos (Sabin Merino, min. 46) e Mollejo.
Gol: 1-0 Merquelanz (min. 23).
Árbitro: Areces Franco (c. asturiano). Cartón amarelo a Malsa (min. 7), Bóveda (min. 22), González (min. 56), Antonio Sánchez (min. 64), Sergio González (min. 81), Marcos André (min. 89) e Mollejo (min. 90+3).
Incidencias: partido correspondente á 41ª xornada de LaLiga SmartBank disputado no Estadio de Anduva a porta pechada debido á pandemia do Covid-19.
