O RC Deportivo tinguiuse de rosa con motivo do Día Mundial contra o cancro de mama. Hoxe Os Nosos, mañá As Nosas (que hoxe xogan en Tenerife), adestran de rosa con camisetas especificamente deseñadas para a ocasión. O modelo que a pasada temporada luciron os porteiros e porteiras do equipo branquiazul personalizouse nas costas coa lema da campaña deste ano: “o rosa é máis que unha cor”, ademais de co número e a firma de cada futbolista.
Todas as camisetas están agora a disposición do Deportivismo, de calquera persoa afeccionada ao fútbol ou de calquera persoa que queira colaborar na causa solidaria na páxina de poxa de camisetas de fútbol Match Worn Shirt: https://www.matchwornshirt.com/es/event/18-10-2022-rc-deportivo-special-event A poxa permanecerá activa até finais deste mes de outubro.
O 100% dos ingresos que o RC Deportivo obteña pola poxa de todas as camisetas rosas coas que adestraron os futbolistas do Dépor e do Dépor ABANCA destinarase á Asociación Española Contra o Cancro na Coruña, concretamente para axudar ás pacientes con cancro de mama e aos seus familiares, ademais de impulsar a investigación co obxectivo de seguir aumentando a supervivencia a esta enfermidade.
