O Dépor volveu aos adestramentos esta mañá na Cidade Deportiva.
A mensaxe de Imanol Idiakez onte na sala de prensa de ABANCA-RIAZOR ao concluír o encontro ante o CD Eldense foi meridiano: "Non vou lamentarme, vou seguir, recuperarnos e pensar no xoves porque o equipo dá a cara, o equipo todos os días ten un funcionamento máis que correcto. Todos os rivais sofren contra nós. Se continúas, ao final todo se equilibra". "Non nos queremos lamentar nin queremos buscar escusas. Imos seguir porque ao final isto dará a volta", engade.
O técnico deportivista asegurou ante os medios de comunicación que "estamos a traballar a resiliencia que é un grandísimo valor nun equipo de fútbol e en calquera grupo. É un dos valores que nós cremos que temos metido aí dentro e ao que lle damos moita importancia. O ano pasado foi clave e este ano outra vez a competición está a pornos enfronte dunha situación parecida na que ten dúas opcións: lamentarche, queixarche e caerche; ou seguir de pé, enfrontar as cousas e crer no que fas. Este equipo non ten ningunha dúbida niso. Demostrámolo a temporada pasada e imos volver a demostrar que cando veñen os problemas mirámoslles aos ollos e non buscamos escusas, simplemente imos cara a adiante".
Como é habitual en cada sesión pospartido, todo o grupo arrincou hoxe no campo 2 cunha activación con rondos.
A continuación, os titulares onte en ABANCA-RIAZOR continuaron con tarefas de recuperación mentres que para o resto do cadro houbo ademais unha roda de pases, unha tarefa de finalizacións e fútbol reducido para concluír.
Gauto, Jaime, Mfulu e Jose Ángel están con traballo personalizado.
Mañá luns 21 de outubro haberá xornada de descanso. Os Nosos regresan aos adestramentos o martes 22 de outubro ás 11:00 en Abegondo cos 5 sentidos postos xa na seguinte cita ligueira en LaLiga Hypermotion, a visita ao Levante UD prevista para este xoves 24 de outubro ás 19:00 horas no Ciutat de València (LaLiga TV Hypermotion).
