O sorteo da segunda rolda da Copa de SM O Rei realizado este mediodía deparou para o Deportivo un enfrontamento fronte ao Alavés.
A eliminatoria, a partido único, disputarase no Estadio ABANCA-RIAZOR entre o 5 e o 7 de xaneiro de 2021.
Deportivo e Alavés víronse as caras en tres ocasións en toda a historia do torneo do KO, con saldo favorable ao conxunto vitoriano por dous a un.
A primeira vez que ambos os equipos se cruzaron foi nos oitavos de final da Temporada 1954-1955. O equipo coruñés impúxose por 2-0 en Riazor, cun dobrete de Pahiño, mesmo resultado que lograron os vascos no encontro de volta no seu campo, con dúas dianas de Wilson. Houbo que disputar un encontro de desempate que tivo como escenario o Estadio Santiago Bernabéu, onde os branquiazuis volveron impoñerse por 2-0, con tantos do propio Pahiño e Polo.
As dúas últimas ocasións en que ambos os clubs se cruzaron saíu triunfador o cadro babazorro. Na Temporada 1997-1998, o Alavés impúxose no encontro de ida dos cuartos de final en Mendizorroza (3-1, goles de Ibon Begoña, Pedro Riesco e Javi Moreno para os locais e de Donato, de penalti, para os coruñeses), resultado que o Dépor non puido remontar en Riazor, onde o encontro finalizou sen goles.
O enfrontamento máis recente data do curso 2016-2017. A eliminatoria de oitavos de final resolveuse a favor dos vitorianos polos goles en campo contrario. O choque de ida tivo lugar en Riazor, onde se produciu un empate (2-2, tantos de Bruno Gama e Joselu para o Dépor e de Christian Santos e Edgar, de penalti, para o Alavés). Na volta, o 1-1 (goles de Edgar e Arribas) deu o pase ao Alavés. Aquela Copa do Rei supuxo o maior éxito da historia do club vitoriano, que alcanzou a final por primeira e única vez na súa historia. O FC Barcelona derrotou ao Alavés no Estadio Vicente Calderón por 3-1.
Actualmente, o Alavés ocupa a décimo quinta posición da Primeira División con 14 puntos en 13 partidos. No cadro alavesista figuran dous exdeportivistas, Lucas Pérez e Joselu.
