O Deportivo sufriu ante o Málaga CF a súa primeira derrota desde a continuación de LaLiga SmartBank após a pandemia do Covid-19, co que non puido dar o que sería un paso de xigante cara á consecución da permanencia na categoría con varias xornadas de antelación.
O adestrador deportivista, Fernando Vázquez, volveu variar 4 nomes no seu once inicial, do mesmo xeito que o pasado domingo fronte á SD Huesca. David Simón ocupou o lugar de Salva Ruiz en defensa, Vicente Gómez supliu a Borja Valle na medular, Emre Çolak fixo o propio con Mollejo en tres cuartos e Beauvue substituíu a Christian Santos na dianteira.
Ambos os equipos saltaron ao terreo de xogo mostrando grandes precaucións ante a tremenda calor reinante na capital da Costa do Sol. O primeiro disparo do encontro non se produciu até o minuto 13, por medio do albanés Armando Sadiku, que mandou o balón por riba do traveseiro do portal coruñés. Un minuto máis tarde correu a mesma sorte un novo lanzamento do venezolano Juanpi Añor.
Mediado o primeiro acto, Juanpi puxo en aprietos a Dani Giménez nun libre directo. O gardameta deportivista rexeitou a pelota como puido despois de que botase moi preto da súa posición. O balón caeu a pés de Adrián que, en posición acrobática, bateu moi lonxe da portería.
O primeiro disparo do conxunto branquiazul produciuse no minuto 28. Emre Çolak abriu cara á dereita para Bóveda, que sacou un fenomenal centro ao segundo pau. Alí apareceu Gaku, que rematou segundo chegaba co interior do seu pé esquerdo. O envío do xaponés, demasiado cruzado, perdeuse á esquerda do marroquí Munir.
O Dépor acelerou o paso nos minutos finais. No 41, Aketxe estrelou no lateral esquerdo da rede un dos seus habituais disparos lonxanos buscando o bote antes de chegar á portería. Cando se cumpría o minuto 45, Gaku gañou as costas da zaga malacitana antes de virarse e deixar a pelota para a incorporación de Emre Çolak. O disparo do turco, ao primeiro toque, foise á esquerda da portería local.
Con todo, en tempo engadido foi o equipo andaluz o que levou o perigo á portería contraria. Tete Morente bateu desde o punto de penalti un despexe en curto da defensa coruñesa nunha acción a balón parado. Dani Giménez evitou o gol milagrosamente despois de que o esférico atravesase un auténtico bosque de pernas.
Tralo descanso, Fernando Vázquez sacrificou a Gaku, castigado cun cartón amarelo na primeira metade, para dar entrada a Borja Valle. Pouco despois, o Málaga CF realizou tres cambios dunha tacada, cambiando o dobre pivote e a un dos seus extremos.
O equipo dirixido polo exfabrilista Sergio Pellicer comezou a dominar con intensidade, a crear ocasións claras. A primeira chegou no minuto 56, nun saque de esquina que cabeceou Lombán, obrigando a Dani Giménez a despexar a pelota cun plástico voo. Dous minutos máis tarde, Hicham Boussefiane non puido precisar o seu remate nun centro raso de Sadiku desde a dereita. O marroquí chegou desde atrás anticipándose a Montero e Borja Valle, pero o seu remate foise moi preto do poste dereito do marco herculino.
O propio Boussefiane si acertou recentemente superada a hora de xogo. Un córner favorable ao Dépor acabou no único gol do partido, pero na portería de Dani Giménez. A defensa malacitana despexou a pelota, Hugo Vallejo devolveuna, o coiro caeu a Luis Muñoz que o tocou coa man a pesar do cal Mollejo fíxose con el. O manchego volveuno a perder a mans de Luis Muñoz e reclamou a man. O colexiado deixou seguir a acción, Luis Muñoz conectou con Juanpi e este atopou cun pase en profundidade a Boussefiane, que gañou a carreira a Borja Valle e superou no man a man a Dani Giménez. Pese ao recoñecemento do VAR, o colexiado deu por válido o tanto.
Pouco despois do 1-0, Fernando Vázquez esgotou todos os seus cambios. O técnico deportivista queimou todas as súas naves con Sabin Merino e Christian Santos en lugar dos dous laterais, Bóveda e David Simón. Pouco antes entraran Mollejo e Hugo Vallejo para xogar en ataque, pero a partir de entón pasaron a ocupar ambos os carrís, quedando Borja Valle, Vicente Gómez e Aketxe en mediocampo, nunha especie de 5-3-2.
A pesar de todo, os branquiazuis non foron capaces de facerse co mando. De feito, o Málaga acariñou o 2-0 nun tremendo canonazo de Juankar, no minuto 75. Pouco despois, respondeu Borja Valle con outro disparo lonxano que se marchou rozando o pau dereito da portería de Munir.
Nos minutos finais, todos os intentos por lograr o empate resultaron en balde. O Dépor sumou así a súa primeira derrota desde a continuación de LaLiga SmartBank tralo parón pola pandemia de Covid-19, despois de 7 encontros invicto, co que continúa con 48 puntos na táboa clasificatoria, 4 por riba das posicións de descenso á espera de que mañá conclúa a 39ª xornada.
Málaga CF: Munir, Cifu, Juande, Lombán, Ismael, Benkhemassa (Rolón, min. 53), Adrián (Luis Muñoz, min. 53), Tete Morente (Boussefiane, min. 53), Juanpi (Renato Santos, min. 85), Juankar e Sadiku.
RC Deportivo: Dani Giménez, Bóveda (Sabin Merino, min. 69), Mujaid, Álex Bergantiños, Montero, David Simón (Christian Santos, min. 69), Vicente Gómez, Gaku Shibasaki (Borja Valle, min. 46), Aketxe, Beauvue (Hugo Vallejo, min. 58) e Emre Çolak (Mollejo, min. 58).
Gol: 1-0 Boussefiane (min. 61).
Árbitro: López Toca (c. cántabro). Cartón amarelo a Gaku Shibasaki (min. 23), Benkhemassa (min. 38), Mollejo (min. 63), Christian Santos (min. 71), Mujaid (min. 72) e ao segundo adestrador deportivista Manuel Pombo (min. 90+2).
Incidencias: partido correspondente á 39ª xornada de LaLiga SmartBank disputado no Estadio de La Rosaleda a porta pechada debido á pandemia do Covid-19.
