Vicente Gómez foi o protagonista esta mañá na sala de prensa do Estadio ABANCA-RIAZOR, onde respondeu as preguntas dos xornalistas.
Sobre a dificultade do encontro deste sábado ante o Cádiz CF no Ramón de Carranza (20:45 horas, Movistar Partidazo), o centrocampista dixo que "para nós cada día é importante, pero é certo que queremos terminar o ano ben". "Até o momento a temporada está a ser boa e que mellor maneira de acabar ben que gañar a un equipo que igual é o que está máis en forma estes dous últimos meses. É unha boa ocasión para despedir o ano en ascenso directo, que é o que queremos", engadiu.
O rival deportivista, aínda que vén de perder en Málaga, sumou 7 vitorias consecutivas nas 7 xornadas anteriores. Vicente quixo dar mérito aos resultados logrados polo cadro cadista. "Falamos de que a Segunda sempre é moi igualada, o que fixo o Cádiz é moi complicado e un aviso para os que nos enfrontamos contra eles. Facer 7 de 7 é moi complicado nesta categoría", apuntou o xogador canario.
A cantidade de xornadas sen coñecer a vitoria fóra de casa tamén foi obxecto de análise. "Non nos obsesiona. Como todo, é mellorable. Temos un reto que é moi esixente e esixímonos gañar fóra. Hai que ocuparse en tentar que a situación cambie un pouco", comentou Vicente, que tamén deixou claro que "se seguimos na dinámica de Majadahonda, o máis normal é que máis pronto que tarde cheguen as vitorias fóra de casa".
Preguntado sobre o seu rendemento individual, Vicente foi sincero. "É verdade que non estou ao mesmo nivel que antes da lesión, pero isto é así, son picos de rendemento. Non me preocupo porque con minutos, con partidos e con tempo todo irá chegando", explicou.
Cuestionado sobre a idoneidade dun empate na visita ao Cádiz CF, Vicente non o dubida: "Eu sempre penso en saír a gañar". De todos os xeitos, o xogador canario matiza que "logo depende da dinámica do partido e as circunstancias que se dean e xa un pode valorar se o empate é mellor ou peor. Nós temos un obxectivo que é ambicioso e por tanto temos que saír a facer as cousas ben e a gañar"
Por último, Vicente Gómez falou da súa aterraxe na Coruña e no Deportivo, onde asegura atoparse "moi cómodo".
"O Dépor é un club moi familiar, no que todo o mundo rema na mesma dirección. Desde o afeccionado até calquera empregado sabe o importante e difícil que é este obxectivo. Chámame a atención para ben o positivismo que se respira. A cidade é moi manexable e a xente moi acolledora. Tamén me chama a atención que cando me paran pola rúa pregúntanme como me atopo na cidade, case non me falan do equipo. Iso fala moi ben da xente da Coruña", analizou Vicente Gómez.
