O Deportivo arrancou hoxe martes cunha esixente sesión a preparación da 1ª eliminatoria da Copa do Rei deste sábado 12 de novembro ás 17:00 no Municipal Luis Ramos de Guijuelo, a partido único xa que o conxunto salmantino é dunha categoría inferior, Segunda Federación.
Despois de dous días sen actividade, o cadro comezou a semana cun esixente circuíto físico en grupos despois dun quecemento con progresións e rondos.
A continuación, o corpo técnico dispuxo un partido e, para concluír, fútbol reducido de alta intensidade.
Mackay, Isi Gómez, que está sancionado en Copa ao ser expulsado a pasada temporada neste torneo co CD Badajoz, e Ibai Gómez tiveron adestramento personalizado.
Pola súa banda, Hugo Ríos, Brais Val e Dani Barcia foron esta mañá os representantes de #ANOSACANTEIRA.
Borja Granero, con molestias nun xemelgo, e Pablo Martínez, nos isquiotibiais, retiráronse antes ao vestiario. Ambos os futbolistas serán sometidos a probas médicas nas próximas horas para saber o alcance exacto deses problemas musculares.
Mañá mércores está previsto un novo adestramento a partir das 10:30 horas.
