O Real Club Deportivo está a traballar para tratar de que, atendendo á normativa vixente, vaian o maior número de socios posibles a cada partido no Estadio ABANCA-RIAZOR. Polo cambiante da situación sanitaria, social e regulatoria, a xestión do acceso dos socios do Deportivo a ABANCA-RIAZOR está a traballarse con perspectiva de varios encontros, pero irase determinando pública e semanalmente enfocada só ao seguinte partido fixado.
Para o encontro da xornada 1 da Temporada 2020-2021, o Deportivo - Salamanca do 18 de outubro en ABANCA-RIAZOR, existirá limitación de aforo polo que non poderán acceder todos os socios, debendo establecerse un procedemento de repartición dos mesmos dentro da bancada da que son abonados sen poder respectar o asento que, como abonado, ten asignado. Estes son os criterios de xestión establecidos:
- Poderán optar a unha das entradas dispoñibles da bancada da que son socios, todos os SOCIOS PROTECTORES do Real Club Deportivo que renovasen o seu carné antes do venres 9 de outubro ás 19:00 h.
- Todos aqueles SOCIOS PROTECTORES que renoven entre a publicación deste procedemento e o venres 9 de outubro ás 19:00 horas, deberán esperar ao sábado 10 ás 10:00 h. para completar o proceso de solicitude de entrada que, para todos os demais SOCIOS PROTECTORES, xa está aberto desde a publicación deste procedemento e que é o seguinte:
1. Todos os SOCIOS PROTECTORES que teñan interese en poder comprar unha entrada para o partido da xornada 1, Deportivo-Salamanca, deberán solicitalo formalmente a través da web: http://reservas.rcdeportivo.es na que deberán introducir os seus datos: nome, apelidos, ID de socio, 4 últimas cifras do DNI e correo electrónico. Este procedemento ten 3 fins: poder realizar a solicitude da entrada; en caso de adxudicación de entrada, poder notificar ao socio que ten dereito á adquisición da mesma; e, ademais, levar un control de repartición en atención á normativa sanitaria de seguimento da COVID-19.
2. A solicitude formal debe realizarse entre a publicación desta normativa e o domingo 11 de outubro ás 23.59 horas, momento no que se pechará o prazo de solicitudes de entradas para o primeiro partido da Temporada. Con cada solicitude obterase un código co que poderá consultar se finalmente ten a posibilidade de adquirir unha entrada.
3. Ao longo do luns 12 de outubro ordenaranse, por antigüidade de socio dentro de cada bancada, a todos os SOCIOS PROTECTORES que completasen correctamente a solicitude, e notificarase vía correo electrónico a aqueles que, en cada bancada, sexan adxudicatarios da posibilidade de adquirir unha entrada dentro da súa localidade como socio. A listaxe de códigos adxudicatarios tamén se publicará na páxina web: www.rcdeportivo.es e na Oficina de Atención ao Deportivista para público coñecemento de todos os socios do Deportivo.
No caso de que o seguinte partido en ABANCA-RIAZOR sexa tamén con limitación de aforo, estes socios aos que se lles asignou a posibilidade de adquirir unha entrada para o partido Deportivo – Salamanca, perderán a súa prioridade con respecto ao resto de SOCIOS PROTECTORES.
4. Do martes 13 de outubro ao sábado 17 de outubro, de 10:00 a 14:00 e de 16:00 a 20:00 h. na Oficina de Atención ao Deportivista, todos os SOCIOS PROTECTORES aos que se lles notificou o seu dereito a adquirir unha entrada poderán pasar a comprala conforme ao seguinte cadro de prezos:
Dado que cabe a posibilidade de que durante a Temporada 2020-2021 non poida celebrarse ningún partido con aforo completo e por tanto, non exista unha segunda Cota de Abono contra a que compensar os 50 euros pagos para facerse socio, o RC Deportivo decidiu compensar xa devanditos 50 euros no prezo das entradas, calculado de dividir o custo do abono, menos os 50 euros, entre os partidos a disputar seguro na temporada (Exemplo: razón pola que a entrada do ADN Branquiazul sub-15 ten custo 0 nalgunhas localidades).
5. Os Socios de Ouro (máis de 50 anos de abonado ininterrompido do Dépor) son, por defecto, adxudicatarios dunha invitación para o primeiro partido que poderán pasar a recoller, co seu carné de Socio de Ouro, pola Oficina de Atención ao Deportivista no horario anteriormente sinalado.
6. No momento da compra da entrada, rexistraranse os datos de fila e asento asignado a cada socio adxudicatario, responsable desde ese momento do uso posterior desa entrada en caso de rastrexo por COVID-19.
7. Dado que se porán á venda miles de entradas durante só 5 días e que, na medida do posible, debe evitarse que se formen longas colas, a entrada adquirida será asignada aleatoriamente no momento da retirada en portelo dentro da dispoñibilidade de cada bancada nese momento. No caso de que se adquiran varias entradas ao mesmo tempo, estas localidades si poderán ser contiguas (pero mantendo as distancias esixidas polo protocolo COVID) en caso de existir dispoñibilidade para iso.
8. A Oficina de Atención ao Deportivista estará aberta de martes 13 a sábado 17 exclusivamente para a venda de entradas para o primeiro partido da Temporada. As altas e renovacións de socios durante esa semana deberán realizarse online na páxina: abonos.rcdeportivo.es
9. Para acceder ao Estadio ABANCA-RIAZOR será necesario presentar a entrada adquirida, non sendo válido ningún carné para o acceso. Por protocolo COVID cada asistente deberá pasar un control de temperatura, higienizar as súas mans, portar máscara en todo momento, sentar obrigatoriamente na localidade asignada na súa entrada (estará identificada cun adhesivo verde de ASENTO DISPOÑIBLE) e permanecer na devandita localidade sentado até finalizar o partido (unicamente permítense desprazamentos aos baños. Non haberá servicio de bares nin está permitido introducir e consumir comida ou bebida no interior do Estadio), respectando a distancia de seguridade de 1,5 metros entre espectadores.
10. Rógase a todos os socios do Real Club Deportivo que manteñan todos os protocolos de distanciamento social e hixiene tanto na retirada das entradas na Oficina de Atención ao Deportivista como nos accesos ao Estadio ABANCA-RIAZOR o día do partido, tratando de adiantar no posible a súa chegada ao Estadio para evitar esperas de última hora.
11. O Real Club Deportivo agradece a todos os seus socios a comprensión e paciencia ante a aplicación desta normativa que busca satisfacer ao maior número de Deportivistas posible nunha experiencia inédita polo momento, por número de asistentes, en todo o fútbol español.
