Raúl Albentosa adestrouse con normalidade esta tarde no Estadio ABANCA-RIAZOR, recibiu a alta médica e entrou na lista de 18 futbolistas convocados para o encontro de mañá sábado 3 de marzo ante o Eibar (18:30 horas, Bein LaLiga), en partido correspondente á 27ª xornada de LaLiga Santander.
A mala noticia hoxe foi a retirada de Fede Cartabia antes de finalizar o adestramento. O atacante arxentino sofre unhas molestias nos isquiotibiais da súa perna dereita, pendente de avaliación médica nos próximos días.
Quedan fóra da convocatoria de maneira obrigatoria Pedro Mosquera, sancionado; e Guilherme, Fede Valverde e o citado Fede Cartabia, lesionados.
No adestramento a porta pechada, Clarence Seedorf repasou conceptos tácticos co seu cadro, co que ensaiou accións a balón parado. Ao finalizar, o técnico holandés incidiu nos remates a portería cos atacantes, ademais de lanzamentos desde o punto de penalti; mentres que na outra metade de campo, defensas e mediocentros traballaron movementos defensivos.
Os convocados concéntranse esta noite no Hotel Melía María Pita, á espera do encontro de mañá ante o conxunto vasco.
Tralo partido ante o Eibar, o cadro adestrarase de novo o domingo 4 de marzo ás 12:00 horas en Abegondo.
