Antonio David Álvarez Rey 'Davo' (Luarca, Asturias, 18 de decembro de 1994) converteuse en novo xogador do Dépor 2023-24.
O polivalente futbolista asturiano, que pode actuar nas tres posicións da fronte de ataque, chega a ABANCA-RIAZOR cedido por unha temporada polo KAS Eupen belga, onde militou desde o pasado mes de xaneiro.
A súa experiencia na terceira categoría do fútbol español resúmese en 3 temporadas (media co Rápido de Bouzas, media co CCD Cerceda, unha no UP Langreo e unha no UD Ibiza), nas que disputou 78 encontros (53 como titular) e marcou 24 goles.
Despois dos seus inicios no fútbol da súa rexión natal (Luarca CF, Real Avilés CF, Oviedo Vetusta, UP Langreo e Caudal Deportivo de Mieres), a carreira de Davo pasou por Galicia. Co Rápido de Bouzas, en Segunda División B, na temporada 2017-18, onde xogou 13 partidos, 5 deles de titular, e anotou 1 gol. E no CCD Cerceda, na segunda parte desa mesma campaña e esa mesma categoría. Co conxunto branquivermello participou en 15 partidos, 6 deles de titular.
A temporada que marcou a súa traxectoria foi a 2019-20, de regreso a Asturias, na súa segunda etapa no UP Langreo e tamén de Segunda División B. Xogou 27 partidos, 23 deles como titular; e anotou 13 goles.
Estes bos números leváronlle a campaña seguinte, 2020-21, ao UD Ibiza, que con el nas súas filas deu o salto esa mesma temporada á Segunda División. Xogou 25 partidos, 21 deles como titular, e marcou 10 tantos, que o converteron no máximo goleador dun equipo que conseguiu o ascenso á categoría de prata.
Na súa primeira temporada no fútbol profesional, a 2021-22, foi un habitual co equipo ibicenco. Davo participou en 36 partidos, 9 deles de inicio, e anotou 2 goles, contribuíndo a manter ao equipo en Segunda.
O dianteiro luarqués arrancou a temporada 2022-23 no Wisła Płock polaco, onde xogou 18 partidos de liga e 2 de Copa, e marcou 9 goles, antes de recalar en xaneiro no KAS Eupen. Co equipo belga, na Primeira División do país, disputou 9 encontros ligueiros.
Anteriormente, Davo asinou unha gran estatística anotadora co Zamora CF, en dúas etapas distintas en Terceira División. Na temporada 2015-16 anotou 13 goles e na 2018-19 fixo 20 dianas.
