Balenziaga: Foi moi ben ir partido a partido. Agora é o momento de facelo un pouquiño máis se cabe
Mikel Balenziaga asegurou esta mañá na sala de prensa de Abegondo que "foi moi ben pensando en ir partido a partido. Agora é o momento de facelo un pouquiño máis se cabe".
De feito, o lateral deportivista non é de mirar o calendario nin do Dépor nin dos rivais de aquí ao final: "O que hai que facer, sexan de arriba ou de abaixo, é sacar os 3 puntos e con iso garantímonos gañar o partido. Entón dá igual o rival, que estea arriba ou abaixo. Demostramos poder gañar en calquera estadio a calquera rival, así que a seguir".
Está convencido que o ascenso "pasa por ABANCA-RIAZOR. Os puntos de casa hai que sacalos. Quedan 8 partidos, 5 en ABANCA-RIAZOR. Iso para nós é unha vantaxe. Pasa por aí, por ir sacando en puntos tanto en casa como fóra, ir partido a partido, como até agora. A ver se ao final, facendo as cousas como as estamos facendo, conseguimos o premio".
Á vez que tamén agarda que a clasificación apertada "vaia así até o final de temporada. Somos equipos que estamos arriba, todos temos o mesmo obxectivo. Agora mesmo sacar cada partido adiante é moi difícil, pero os de arriba estamos a demostrar que os estamos sacando. Ao final da primeira volta tiñamos unha desvantaxe grande. Con esta xeira que levamos xa nos puxemos onde queremos. Sacamos un punto. Hai que seguir sumando para que esta brecha fágase maior".
Mikel Balenziaga subliña que nesta recta final "demostramos que tendo baixas o equipo deu a cara, deu moi boa imaxe. Sacamos os partidos adiante e ademais os xogadores que menos minutos estaban a ter non é que cumprisen, é que fixeron un gran partido e foron moi importantes nos resultados dos partidos".
Advirte que o Unionistas de Salamanca CF, rival este domingo 7 de abril ás 17:00 (TVG-2 e FEF TV), "vén en moi boa serie. Está a facer as cousas moi ben. Vese na clasificación. Imos volver a ter un partido complicado pero para nós volve ser en ABANCA-RIAZOR. Todos preferimos xogar no estadio despois de gañar fóra de casa. Estamos con ganas de que chegue ese partido".
Finalmente a nivel persoal desvelou que "hai unhas semanas estaba con problemas físicos. Agora neste momento estou ben, así que contento", concluíu.
