Celso Borges e Ola John son as novidades na convocatoria de 19 futbolistas (co tres porteiros) para recibir mañá mércores 5 de abril ao Granada CF en Riazor (20:30, Bein Sports). Caen da convocatoria Joselu, sancionado por acumulación de amoestacións; ademais de Gaël Kakuta, lesionado; e Pedro Mosquera, aínda sen a alta médica.
O adestramento desta mañá, coa participación do fabrilista Nacho Monsalve, consistiu fundamentalmente nun partido once contra once en Riazor, a porta pechada. Pepe Mel, como é habitual, deu constantes instrucións aos seus futbolistas e parou o xogo para incidir en accións a balón parado (saques de esquina...)
Os futbolistas convocados concéntranse mañá mércores, día do choque ante o Granada, ás 13:15 no Hotel Meliá María Pita. Tras o partido, os 19 xogadores regresarán a cear ao hotel, co fin de favorecer a recuperación física cunha boa alimentación, posto que o sábado 8 de abril, o Dépor visita ao Sevilla (18:30, Bein Sports).
