Costel Pantilimon (Bacău-Romanía, 1 de febreiro de 1987) converteuse esta tarde en novo porteiro do Real Club Deportivo. O internacional romanés chega cedido ata final de temporada polo Watford da Premier League inglesa.
Porteiro de gran envergadura e altura (2,02 m.) Pantilimon debutou como profesional no Aerostar Bacău en 2003 antes de dar o salto á Primeira División do seu país para defender a portería do FC Timișoara, equipo no que militou cinco temporadas. A súa carreira continuou en 2011 nas illas británicas para xogar no Manchester City (2011-2014), Sunderland (2014-2016) e Watford (2016-2017).
Internacional en todas as categorías da selección romanesa, disputou 25 encontros coa absoluta, coa que se atopa actualmente concentrado xunto ao dianteiro deportivista Florin Andone.
