As accións de estratexia, unha faceta que tan bo rendemento deu ao equipo na pasada temporada, foron as protagonistas esta mañá no adestramento do Dépor en Abegondo.
Así, e após pasar pola sala de vídeo, Imanol Idiakez dedicou boa parte da sesión ao ensaio no campo 3 destas xogadas a balón parado.
Os Nosos son conscientes da igualdade que reinará en LaLiga Hypermotion e que calquera mínimo detalle pode decantar un partido dun lado ou doutro. "É unha liga moi igualada na que a diferenza de puntos é moi pequena entre a parte alta e a baixa", comentou onte na sala de prensa uno dos capitáns, Diego Villares.
Unha activación con xogos completou a calorosa mañá na Cidade Deportiva.
Sergio Escudero está con adestramento personalizado; mentres que Rubén López, Pablo García e Íker Vidal foron os representantes de ANOSACANTEIRA.
Dous dos futbolistas habituais no primeiro equipo desde o inicio dos adestramentos alá polo 10 de xullo, o meta Alberto e Kevin Sánchez, están citados co Fabril para disputar esta tarde no campo García Hermanos de Betanzos o Trofeo San Roque.
Mañá venres o Dépor adestrarase a partir das 10:30 en Abegondo, no último ensaio antes do debut en LaLiga Hypermotion ante o Real Oviedo deste sábado 17 de agosto en ABANCA-RIAZOR ás 19:00 horas (LaLiga TV Hypermotion e Movistar+).
