Marina Artero compareceu esta mañá na sala de prensa de Abegondo. A xogadora cedida polo Athletic Club é consciente de que "esa primeira vitoria está a custarnos", pero cre que "o equipo ten boas sensacións" e afirma que están a traballar ben. Ademais, confía en que esta fin de semana "poidan chegar eses tres puntos".
A pesar da situación, Artero ve tanto ao Corpo Técnico como ás xogadoras con moita tranquilidade e non cre que lles "pese" a circunstancia.
A xogadora asegura que "analizamos o partido de Badalona e atopamos os erros", "sabiamos que esta Liga F non ía ser sinxela", engade. No referente ao Madrid CFF, rival deste sábado 12 de outubro ás 16:00 en ABANCA-RIAZOR (Dazn), sabe que "é un equipo moi vertical e por dentro é un equipo moi móbil", polo que considera que deberán ser un "bloque sólido".
Por último, resalta a forza que brinda xogar en ABANCA-RIAZOR e anima á afección a acudir ao encontro do sábado: "en casa sentimos que temos unha xogadora máis".