O Deportivo ABANCA volveu remontar, hoxe en campo do DUX Logroño do mesmo xeito que no primeiro partido en cancha do CE Europa, para manter o pleno de vitorias despois de tres xornadas que lle deixa como líder en solitario.
As branquiazuis gañaron os seus tres encontros polo mesmo marcador: 2-1. Nos dous partidos a domicilio comezaron perdendo e déronlle a volta ao marcador, e no único partido en Abegondo, aínda que empezaron gañando, desfixeron a igualada que lograra o Atlético B cun tanto no minuto 90.
A primeira metade mostrou a dous equipos igualados, pero o Dépor ABANCA gozou dunha fenomenal oportunidade para abrir o marcador no minuto 5, cando Millene estrelou unha cabezada no pau. A resposta local chegou no minuto 13 nun disparo de Cintia que acabou en saque de esquina.
Os 31 graos centígrados que se rexistraban pasadas as 5 da tarde en Logroño obrigaron a que á media hora o partido detivésese para realizar unha pausa de hidratación, como especifica o regulamento para os encontros disputados en condicións de calor extrema.
O DUX Logroño gozou da súa mellor oportunidade na primeira parte cando un despexe da zaga superou por alto a Raquel García e deixou a Cintia soa ante Yohana. A dianteira local encheuse de balón e disparou de primeiras, enviando o coiro ás nubes. Corría o minuto 36.
Poucos segundos despois, contragolpeou o Dépor ABANCA por medio de Laurina, que lanzou en profundidade a Millene. A brasileira serviu desde a esquerda á área pequena, onde Montse Quesada se anticipou por pouco á chegada desde atrás de Ayaka, que non puido rematar por pouco.
No minuto 42, un centro-chute de Samara desde a dereita desviouno a porteira local a saque de esquina. Ese córner bateuno Inés no segundo pau, moi preto do recanto contrario.
A gardameta local foi protagonista no minuto 43, cando entregou o balón a Ainhoa Marín, cuxo dereitazo cruzado detivo Montse Quesada emendando o seu erro.
A segunda parte comezou con malas noticias. No minuto 48, o DUX Logroño adiantouse no marcador. Centro de Sofía desde a esquerda e Olga García rematou ao fondo das mallas coa dereita chegando desde atrás.
Con todo, pouco duroulle a alegría ao conxunto rioxano, xa que no minuto 51 chegou o empate do Dépor ABANCA. Foi após unha xogada individual de Millene, que cun recorte sentou á súa marcadora na área e serviu un pase da morte que empuxou Paula Gutiérrez.
Antes de cumprirse a hora de xogo, Millene estrelou un remate no pau e Cris, que acababa de entrar por Ainhoa Marín, recolleu o rexeite e estrelou o esférico no traveseiro. A mala fortuna cebábase coas pupilas de Irene Ferreras.
O Dépor ABANCA insistiu e atopou o premio no minuto 73. Ana de Teresa adiantou ao equipo branquiazul ao bater no man a man á porteira logroñesa despois dun pase de Cris buscando e atopando as costas da defensa rioxana.
A propia dianteira ibicenca puido sentenciar a contenda no minuto 82, após unha mala saída de Montse Quesada. ADT, coa porteira fóra do seu marco, disparou desde 25 metros pero o balón foise fóra.
O DUX tentou equilibrar a balanza con varios disparos, como unha volea de Valderas a centro de Luvanga no minuto 84 que se perdeu por riba do traveseiro da meta defendida por Yohana.
Charle tivo a oportunidade de pechar o partido cando se cumpría o tempo regulamentario. Após un remate en semifallo de Eva Dios nun intento de chilena, o coiro caeu á soriana, que bateu con forza pero a pelota marchou rozando o poste.
A pesar dos 6 minutos de tempo engadido, o Dépor ABANCA aguantou as arremetidas locais e sumou unha nova vitoria, para continuar con pleno de triunfos, tres de tres, no máis alto da táboa de Primera Federación Iberdrola, agora xa en solitario trala derrota do Alhama CF en campo do CDF Osasuna Femenino.
DUX Logroño: Montse Quesada, Nora (Valderas, min. 76), Atiq Ez-zity (Saray, min. 76), Iria Castro, Sofía, Laura Martínez, Encarni, Marta (Belem, min. 46), Cintia, Olga García (Luvanga, min. 56) e Alice (Marina, min. 66).
Deportivo ABANCA: Yohana, Samara (Charle, min. 69), Inés Altamira, Raquel García, Elena, Henar, Ayaka, Ainhoa Marín (Cris Martínez, min. 57), Paula Gutiérrez, Laurina (Eva Dios, min. 88) e Millene (Ana de Teresa, min. 69).
Goles: 1-0 Olga García (min. 48); 1-1 Paula Gutiérrez (min. 51); 1-2 Ana de Teresa (min. 73).
Árbitra: Beatriz Arregui Gamir (c. vasco). Cartón amarelo a Belem (min. 63) e Elena (min. 90+2).
Incidencias: partido da 3ª xornada de Primera Federación Iberdrola disputado na Ciudad del Fútbol de Pradoviejo (Logroño).
