O Dépor ABANCA venceu en Vitoria ao Alavés Gloriosas para alargar a súa fenomenal xeira, reforzar o seu liderado e poñer baixo presión aos seus rivais polo ascenso á división de honra, que deben xogar os seus partidos da presente xornada vendo ás branquiazuis 6 e 10 puntos por riba.
O conxunto branquiazul por fin puido atoparse case como en casa fóra dela, ao disputar o seu primeiro partido da temporada en céspede natural lonxe de Abegondo. O Dépor ABANCA sacou proveito diso para poñer fin a unha serie de dous partidos sen gañar como visitante.
O partido comezou cun Alavés Gloriosas atrevido, cunha presión moi alta que incomodou ao Dépor e que provocou que os primeiros achegamentos, como un disparo alto de Carla Morera no minuto 4, fosen do equipo local.
Con todo, o Dépor ABANCA sacudiuse esa presión no minuto 9. E fíxoo para abrir o marcador. Ainhoa Marín internouse pola dereita e centrou á área para a chegada en segunda liña de Eva Dios, que controlou o coiro e cruzouno ante Sofía para levalo ao fondo da rede. Foi o segundo tanto da temporada para a pontevedresa.
Tres minutos máis tarde, a brecha no marcador debeu ser maior. A colexiada anulou un gol a Millene por un fóra de xogo inexistente, nunha cabezada a centro desde a dereita de Cris Martínez.
O conxunto vitoriano controlou o partido durante tramos máis longos a partir de entón, pero apenas puxo a proba a Lucía. A gardameta deportivista tivo que intervir soamente nun par de ocasións até o descanso. A máis esixente, un dereitazo de Almudena desde fóra da área no minuto 39 que blocou con seguridade.
O Deportivo ABANCA tivo outra opción para aumentar a súa vantaxe, xa en tempo engadido. Ainhoa recolleu un centro pasado ao segundo pau e meteu a pelota cara á área pequena, onde Millene revolveuse e disparou á media volta. O balón foise a córner por pouco após rozar nunha defensa.
A segunda metade comezou coa mellor ocasión local, no minuto 51. Foi nun pase en profundidade para Elene Errasti que quedou man a man con Lucía, que adiviñou a súa intención de orientar o control cara á súa esquerda e desbaratou a oportunidade.
Perdoou o Alavés Gloriosas e o Dépor cobrouno dous minutos despois. As branquiazuis fixeron o segundo tanto nunha falta ensaiada que desde mediocampo colgou Paula Gutiérrez, baixou de cabeza Raquel García e controlou Millene dentro da área. A brasileira recurtou en dúas ocasións para atopar oco e sacar un dereitazo raso co que bateu a Sofía. A dianteira deportivista, máxima goleadora do equipo, alcanzou así os 10 tantos este curso.
O Alavés tentouno de todas as maneiras pero apenas xerou perigo. As vitorianas, iso si, destaparon a súa retagarda en pos da remontada, o que derivou en varias oportunidades claras para o Dépor ABANCA. No minuto 80, Eva Dios, após baixala de cabeza Inés Altamira nun córner, disparou por riba do traveseiro. No minuto 86, Lucía Rivas gozou dunha dobre ocasión nada máis ingresar no terreo de xogo. O seu primeiro remate estrelouse contra unha defensa e o segundo detívoo a porteira en dous tempos.
Preto do minuto 90, a colexiada anulou un gol ao Alavés Gloriosas, por fóra de xogo de Laura Moreno.
Con esta nova vitoria, o Dépor ABANCA suma 44 puntos no máis alto da táboa. As branquiazuis levan 3 partidos sen encaixar un gol e acumulan 14 xornadas sen perder, con 9 vitorias e 5 empates. Ou o que é o mesmo, 32 dos últimos 42 puntos en xogo.
As branquiazuis xa fixeron o seu traballo e volven presionar ás súas rivais. O RCD Espanyol (segundo clasificado con 38 puntos) recibe esta tarde ao DUX Logroño. O FC Barcelona B, terceiro tamén con 38 puntos, visita ao SE AEM, quinto con 29 puntos, mañá ao mediodía. E o Alhama CF, cuarto con 34 puntos, recibe ao CD Alba Fundación Femenino tamén mañá, neste caso pola tarde.
A Primera Federación Iberdrola detense durante dúas semanas e volverá a fin de semana do 10 de marzo, no que o Dépor ABANCA recibirá a visita do Alhama CF.
Deportivo Alavés Gloriosas: Sofía, Cris Auñón, Pichi, Gantxegi, Almudena (Olga, min. 63), Judith (Carrillo, min. 46), Sheila, Lyons-Clark (Monente, min. 80), Carla Morera (Da Eira, min. 80), Elene Errasti (Laura Moreno, min. 56) e Alba Aznar.
Deportivo ABANCA: Lucía, Cris Martínez (Samara, min. 77), Inés Altamira, Raquel García, Clara, Henar, Paula Gutiérrez, Ainhoa Marín, Eva Dios (Lía, min. 86), Charle (Laurina, min. 54) e Millene (Lucía Rivas, min. 86).
Goles: 0-1 Eva Dios (min. 9); 0-2 Millene (min. 53).
Árbitra: Verónica González Sánchez (c. castelán-leonés). Non mostrou cartóns.
Incidencias: partido correspondente á 19ª xornada de Primera Federación Iberdrola disputado no campo 4 da Ciudad Deportiva José Luis Compañón.