O Fabril enfróntase mañá domingo 20 de outubro ás 17:00 (YouTube RC Deportivo) no campo principal de Abegondo ao UM Escobedo da localidade cántabra de Camargo, un recentemente ascendido.
Os fabrilistas chegan a este choque da 8ª xornada após o mal sabor de boca de Luanco, onde un mal inicio de partido condenou ao filial á derrota sen apenas reacción.
Óscar Gilsanz, en rolda de prensa, subliñou ante os medios de comunicación que "cada partido hai que traballalo e pelexalo moito desde o principio". "Hai que ser conscientes de que hai que traballar moito o partido porque todos os partidos son igual de difíciles", insistiu.
Con 7 puntos na táboa, o filial é 13º na táboa con 7 puntos.
O Fabril recupera a Luisao após a súa lesión muscular e, por contra, son baixa Álex Pereira, Mardones, Manu Ferreiro e Quique Teijo, este con unha fisura no peroné dereito.
Os xuvenís Noé, Guerrero e Pablo García completan a citación. En rolda de prensa, o técnico deportivista asegura que Noé (na foto da noticia) leva estar en dinámica do filial "con normalidade polo noso labor, a nosa dinámica diaria de tratar de que continuamente esteamos a dar pasos cara adiante cos mozos en idade xuvenil como Noé, Guerrero ou Pablo García; xogadores que o outro día coincidiron os 3 no mesmo 11, iso en Segunda RFEF é unha boa noticia para o Club sobre todo, para o traballo da xente que leva con eles moitos anos aquí en Abegondo. E seguimos dando pasos cara adiante. Está a sumar minutos, facendo cousas ben, outras que ten que mellorar como os demais, pero estamos moi contentos con todos no traballo diario".
Pola súa banda, o UM Escobedo, que a pasada fin de semana perdeu (0-2) no seu campo co Pontevedra CF, suma 8 puntos na 12ª posición.
Lonxe do seu campo, o equipo cántabro esta temporada gañou ao Real Ávila CF (0-1) e á SD Compostela (1-2); e caeu co CD Laredo (1-0).
Óscar Gilsanz advirte que "é un rival moi ben traballado, que nos 7 partidos que levamos manexou diferentes estruturas. Ten moitas variantes en canto ao seu fútbol. É un equipo capaz de gañar xogando ao contraataque como fixo en Ávila, ou de gañar xogando directo como fixo contra a SD Compostela, ou de tentar combinar e ser un equipo que por dentro manexe opcións e teña unha saída limpa de balón. Vainos a obrigar a ler ben o partido".
Samuel San José, adestrador do conxunto cántabro, manifestou do Fabril que "son algo irregulares no xogo pero con picos de rendemento moi altos no que poden desequilibrar os partidos"
O Club mantén activo o protocolo de apertura con rexistro de asistentes da Cidade Deportiva.
Poden retirar entradas dispoñibles, até esgotar a bancada e sen ningún custo adicional, todos os socios e socias do RC Deportivo que o tramiten formalmente a través da web bancada.rcdeportivo.es, na que deberán introducir a súa ID de socio e os 4 últimos números do DNI. A continuación, seleccionar unha localidade libre e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutras persoas socias, unha única pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O RC Deportivo solicita que unicamente tramiten a entrada aqueles socios e socias que vaian poder acudir ao partido, para evitar que queden afeccionados sen poder asistir unha vez completado a repartición da bancada nun proceso 100 % telemático.
Tamén está habilitado simultaneamente o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
